القصيدة: اللهم بلغنا محرم
أداء: مسلم الوائلي
كلمات: كرار حسين الكربلائي
~~~~~~~~~~~
عاشوراء .. جمهورية الخدمه
عاشوراء .. جيش يلم شكو زلمه
عمر الخادم بلا خدمه اظلم
اللهم بلغنا محرم محرم
~~~~
لشهر الخدمه اشتاگينه
وعاشوراء امتانينه
بأيامك يابو سكينه .. هلا
عاشور الحب ننتظره
نلطم بثواب الزهره
يا خيمة كل الفقره .. هلا
محضرين الك جف وصدر
نلطملك بكل العمر
لو موته وبنص الگبر ... نلطم
لو مجلس بأخر فلك
روح ومشاعر نوصلك
يحسين بالعشره الك ... نبصم
بسم الله .. مجراها ومسراها
بسم الله .. خدامك علي وياها
هاي الدمعه سر الأسم الأعظم
اللهم بلغنا محرم محرم
~~~~
حبيت اسمك اول شي
حبيتك دمعه برمشي
لو اعمه بدربك امشي .. أمان
كلما اطب حسينيه
الگه الحب والحنيه
تباوع يحسين عليه .. بأمان
بوصلتي صوبك تنحرف
يلما الي غيرك عرف
كل الأرض طابو صرف ... بسمك
لو اكبر وظهري انحنه
تلگاني اخدم كل سنه
عندي المهم خادم انه ... يمك
كل الناس .. تدري بعهدي ما ابيعه
كل الناس .. اتسميني يبو دميعه
اسمك من يمر يا دمعه تنضم
اللهم بلغنا محرم محرم
~~~~
الما دگوا باب الخدمه
اعمه يگود بجف اعمه
واليندلون النعمه .. الخدم
وادمنه الفقره ترافگ
بس اليلطم والعاشگ
والضدك مثل الحارگ .. خيم
وداعت ضماك ومنحرك
ملح السوالف منبرك
خالقنه الله الخاطرك ... شكراً
انت الهوه النتنفسك
قديس ربك قدسك
ونروح فدوه المجلسك ... طراً
وين نروح .. يمغرگنه من خيرك
وين نروح .. ما عدنه ابو غيرك
بس ثوب الخدامه علينه يرهم
اللهم بلغنا محرم محرم
~~~~
يالحبيتك عالفطره
مو حب من اول نظره
دره واغله من الدره .. ملاك
انطيك ايام سنيني
بس وياك تخليني
مثلك ما شافت عيني .. ملاك
مثلك يروحي ما شفت
گلبك علينه بكل وكت
الگاك كلما ألتفت ... خيمه
شفتك حبيبي الأولي
شاغلني عن ناسي وهلي
دون البشر شفتك الي ... خيمه
والعباس .. ابو فاضل علي شاهد
والعباس .. غيرك ما احب واحد
وانه ادعي بدعاء الگلبه مغرم
اللهم بلغنا محرم محرم
~~~~
المثلك تصعب آلامه
ليش يسحگون ايتامه
ضامي وحرگوا گدامه .. خيام
المثلك نحره يبوسونه
ليش بسيف يذبحونه
صدرك ليش يسحگونه .. حرام
الما صايره حته بحلم
زينب يشوفوها الزلم
تسمع ابوها ينشتم ... صعبه
والنايبه الما تنعقل
تتجتف وتصعد هزل
زينب عله جفها الحبل ... صعبه
آه الشام .. شمسوي بگلب زينب
آه الشام .. من عنده الحجر شيب
من شام المصيبه الفرحه تحرم
اللهم بلغنا محرم محرم
••••••••••••••••
رد مع اقتباس