حسين لروحي يارباه ،، قِبلة
على چفوفي وضع من متت ،، قُبلة
دعيتك لا تصعد الروح ،، قَبله
ولا اتقدم اعله ابن الزچية
*****************************
موت مهيوب ماصار بالدنيا مثله
مات عباس ويريد من ربه مُُهلة
راد هالروح متعوف المخلوقة لجله
روحه الخضيبة ،، تتبع حبيبه
*****************************
مشهد فجيعة ،، صوب الشريعة
خلف الطبيعة ،، بالما ورائيات
عباس اجاله ،، الموت ودناله
والحاله حاله ،، بالمختصر مأساة
راس وتهشم ،، جسم وتخذم
فاضت مع الدم ،، روحه بسموّ الذات
ظل عنده مطلب ،، واستمهل الرب
والروحه يرغب ،، بالطف تظل ساعات
گال لله هالروح خجلانه تصعد
وهاي چفين دعواه مگطوعه تمتد
دون معراج هالروح استأذن واجه الرد
والرب مجيبه ،، تتبع حبيبه
*****************************
المحد يلوحه ،، تنزف جروحه
تتهاده روحه ،، بين السمه والگاع
ترف بقهرها ،، تشبح نظرها
اعله اللي حظرها ،، عالشاطي صبره ضاع
حسين بعبرته ،، بانت كسرته
قلّت قدرته ،، واختلفت الاوضاع
المتعنّي توه ،، مو هذا هوه
گام ايتلوه ،، من شدة الاوجاع
حسين من صاح بالكون اصداءه تسري
صاح الآن الآن كسرولي ظهري
وروح عباس بالغيب مدمعها يجري
ظلت كئيبة ،، تتبع حبيبه
*****************************
موته اضحى واقع ،، وبهالوقائع
روحه تتابع ،، رجعة اخوه حسين
اشبيه برجوعه ،، هاجت دموعه
احنى ضلوعه ،، بدربه وگع مرتين
بكل مرة يوگع ،، شي بيده يرفع
اعليه قبلة يطبع ،، وبي يمسح اعله العين
روحه ادرى واعلم ،، حسين شلگه وضم
وشقبل وشم ،، لابد لگه الچفين
هنا چفين وهناك جود السقاية
وهاي عالگاع ياحيف مرمية راية
شاف آثار عباس بكل الزواية
روحه قريبة ،، تتبع حبيبه
*****************************
حسين لخيامه ،، رد بعلامة
دمعه يتهامه ،، بمشاهك الانفاس
اوضح بعدها ،، خيمه الكصدها
طيح عمدها ،، يعني انتهى العباس
روحي ابأجلها ،، تزايد خجلها
اخته بوجلها ،، گامت تدگ عالراس
الامر اشيحسمه ،، والدنيه قسمه
الما عنده جسمه ،، روحه ابأمض احساس
غاب من چان كفال زينب يحسرة
اعتاز چفين الحسين يسندله ظهره
الروح تحتار عالغوث ماعدها قدره
تحن للغريبه ،، تتبع حبيبه
*****************************
المهله الطلبها ،، واضح سببها
تالي عگبها ،، ميهمه وين ايروح
هذا التزامه ،، وي روح امامه
بسوح الكرامه ،، روح وتتابع روح
وحده النهايه ،، بس روحه غايه
تجرع منايه ،، كثرة وتشيل جروح
مهما تحمل ،، للمهله مفصل
يتسمه مقتل ،، من ينزف المذبوح
هاي لحظات انذار صعبة اتوصف
صار ملزوم بالموت صار ايتأسف
تروح هالروح للّه من ينتهي الطف
لآخر مصيبة ،، تتبع حبيبه
*****************************
كلمات الشاعر : علـي السقــاي
تدوين : Zahraa alobaidi
MP3
رد مع اقتباس
المشاركة الأصلية كتبت بواسطة KASSAR
