ـــــــــــــــــــــــــ ـــــــــــــــــــــــــ ـــ
القصيدة: أينَ مُعزُّ الأولياء
أداء:محمّدبَاقِر الخَاقانيّ
كلمات: عبّاس الشِبلاوي

ـــــــــــــــــــــــــ ـــــــــــــــــــــــــ ـــ
اينَ مُعزُّ الاولياء.. صوت الحِزن صاح
ـــــــــــــــــــــــــ ـــــــــــــــــــــــــ ـــ
ب إسمك بِديته..شهر العُطاشه
يالماخذ عيونك مُصاب الحومة
انتَ المُعزّىٰ.. بالصاحته إخته
يحسين خُوية طوّليت النومة
مِن يا هي تِبديه مجلسك وشهر المُصايب هَل
مِن چف رُقية والحبل لو عمّتك والتل
تُبقه ويّ جدّك عالتُرب لو تلحگ الهِزّل
ليتَ شعري اينَ إستقرّت بِكَ النَوىٰ يا مولاي
يِجري دَمعك للگوّة صِعدن علىٰ الهِزل لو للماي
يالحاير بهالغُربة زينب هَم ما لگت بالطف راي
شبّت النار بخِيمها و ركضة إطلعت بالعَويل
ودّتها خيل إعله إخوها و ردّتها مِن يمّه خيل
شبچت العشرة وتنادي يَـ إبن اُمّي ما عندي حيل
عطشانة والحَر تَعبني وحِملي ب جِفاكم ثگيل
تبكي صَباحاً ومساء ..لصيوانك الطاح
اينَ مُعزُّ الاولياء.. صوت الحِزن صاح
ـــــــــــــــــــــــــ ـــــــــــــــــــــــــ ـــ
حگ هـٰذا حِزنك.. اليقرا المُصيبة
مو مثل اليشوف المُصيبة ب عينه
اليكتب خِيامك..نار إحرگتها
ما لاحته النار و چِوت جِدمينه
وحدك غريب بكربلا واگف ب ظُهر الهَم
ومُهر الحُسين تشاهده راجع عَ المخيّم
رَد إعله زينب باكياً ومغطّي وجهه الدم
مَخزي راجع والنِسوة بُرزن مِن الخِدر و الطف عين
"برزنَ مِن الخدور علىٰ الخدود لاطمات مُخمشةٌ وجوهُهنّ ،وب العَويلِ نادبات،و إلىٰ مصرعك مُبادِرات"
ب حُرگة لُطمن مِن شاهدنّه مايل سِرج مُهر حسين
وسِكنة صاحت يا مُهر إبونا وين المِشه بظهرك وين ؟
إلتمّن غرايب ثَكالىٰ و عـ الوِجه للحسرة لون
أصبحنَ مُذلّلاتً مِن بعدِ عِزّ الظعون
ف علىٰ مِثلِ الفَواطم فَليصرخُ الصارخون
بكربلا تبدّل وكتهن وما لگن ع الغُربة عُون
في ارضِ كربٍ وبلاء.. عِزّ الخِدر راح
اينَ مُعزُّ الاولياء.. صوت الحِزن صاح
ـــــــــــــــــــــــــ ـــــــــــــــــــــــــ ـــ
يتخطّه جِدمك..بالغاضرية
مَحني الظهر مِن الخِيم للمصرع
وتسمع صَداها..ركض الحَوافر
مِن حسين لخِيامه تروح وترجع
شفت الحَوافر دنّته مِن مچانه مِن عُبرن
وجروح گلبه إعله التُرب غيرة وهضم نِزفن
مِن دار طَرفه إعله الخِيم وشاف الحرم طُلعن
بعينه شاهد خيل العَساكر هِجمت علىٰ خِيامه وصاح
إقصدوني هـٰذي نِسائي ليسَ عليهِنَّ جُناح
وإخته صاحت أدرِك خِيامي وگاملها مو كِلّه وطاح !
ما سولفولك شِفتها طِيحة خِيام الدَلال
حال الطفوف بكُبرها وزينب لوحّدها حال
دارت الخيل إعله إخوها ودارت بچفها الحِبال
وبعينك الدَمعة حيرة بين الهِزل والرِمال
وجروح ربّات الخِباء..كسرتلك جناح
اينَ مُعزُّ الاولياء.. صوت الحِزن صاح
ـــــــــــــــــــــــــ ـــــــــــــــــــــــــ ـــ
هَل مِن جَزوعٍ.. رِدت لمُصابك
تعينه رُغم ما بيك هَم و لُوعة
مِنها وعَرفنا..الـ أهله سِباية
ما يُبره جَرحه ولا تِجفّ دموعه
شتُبره وعلىٰ ظهور الهِزل طُلعت حرايركم
وما خلّت شموس الدرب لون ب غَرايبكم
تَقشَّرَتْ وجوهُهُنّ مِن الحَر فِواطمكم
شُيطفي ناره الگدّامه ظعنه ذُلّاً إلىٰ القصرِ يُساق
وعينه شافت أيديّ الفِواطم مغلولةً للأعناق
والهضيمة گبال الشِماته طَافوا بِهِمْ في الأسواق
هاي المُصيبة الچبيرة المّا سَد حِزنها عزاء
ساقُوا بناتَ مُحمّد كما تُساقُ الإماء
نادن :" ألا مِن مُغيثٍ " ومحدّ يغيث النساء
تِعبن شماته الفِواطم مِن السبي وكربلاء
يَعلو متىٰ ذاكَ اللواء..وهالغُربة تنزاح
اينَ مُعزُّ الاولياء.. صوت الحِزن صاح
ـــــــــــــــــــــــــ ـــــــــــــــــــــــــ ـــ