هنا يهل العراق هنا جاي حسين ابشركم
وين الله وصدك تطلع. صدكية رسايلكم
خلها تفرح الكوفة . بعد جم يوم وتشوفه
**
حنوا البوب جاي الخير وافرشوا الورد بالديرة
باجر مايضل كل ضيج. اجه حلال كل حيرة
عزيز الله كصدكم ضيف. وتراها جيته اجبيرة
اوكفوله هله بكل صوب ولحد يلتهي بغيره
باجر كل خريف يموت ويهب بس ربيع حسين
ويا ماريد كل تقصير ينحط كون وسط العين
البخت ينكط من حروفه. خلها تفرح الكوفه
**
وخاف من السفر تعبان. يهل الكوفة حضروا الماي
وشكو طوعه بعشايركم. انخوها اعله ضعن الجاي
شما بيكم افزعوا اخيام. يستاهل حسين افياي
وين اللي يرد الروح اجه ابضعنه شكو وفاي
كتاب ونازل من الرب لاينمل ولاينعاف
عينوا خل يفرحكم صيروله ضهر واجتاف
كل الخير بجفوفه. خلها تفرح الكوفة
***
لخاطركم كطع حجته. وتعنه يريد خاطركم
اثبتولة الرسايل ماي. لاتنشف رسايلكم
كلب حسين خوش فياي. قصر يزيد ليغركم
حنين ونضرته اتطيب. ويندل كل مواجعكم
كل العافيه بجيته ودوة للتمرض عيونه
فرصة حسين ياهل الناس بحجيكم لاتخسرونة
بجماله يهيم اليشوفة. خلها تفرح الكوفة
**
وينه الميت اعله حسين. وينه اليعشك وهايم
الضعن جايب اعز عريس حضروا شموع للقاسم
وكمر ماي وضوة يوزع ادعولة يصل ساالم
واطفاال اعله مد الشوف. بجيها يفزز النايم
منو الرايد يكحل العين وينه الواكف موزر
افتحولة الكلب والبيت اجه وجايب علي الاكبر
يطيب وتنتهي ضروفه. خلها تفرح الكوفه
*
ضعن شايل ستر دنيا وخدر مهيوب ومرتب
بي زينب علي الكرار. وبنات حسين هم زينب
وبي عباس بكماطة الرضيع المن بعد ينحب
وبيه اصحاب خوش اصحاب واحدهم سهم لوهب
هاي الفرصه تعدل جيل. ومامش منها هالفرصه
ماوصيكم اعله حسين. العاشك عيب يتوصه
وينه الگال ماعوفه خلها تفرح الكوفه
__
الشاعر :: حسنين السعدي
MP3
رد مع اقتباس