القصيدة: ام الكفيل
أداء: مسلم الوائلي
كلمات: أحمد الذهبي
~~~~~~
ابجي بخشوع .. مو بس دموع
عله باب الحوائج طيحت عين
ام الأسود .. سر الخلود
المضحيه بولدها الخاطر حسين
~~~~
اذا كل عمري اخسره
وادگ صدري وكسره
وعله الراس من الطم عليها
ابد ما اجازي منها
ولو ذره بحزنها
حزنها شيجازيه وبجيها
اذا رايد اجازيها
النحر ما يوافيها .. والعيون
اعيالي من اقدمهم
اخوتي والأهل كلهم .. شيسدون
اتمنه اصير .. خادم زغير
وتكتبني بسجلها ويه اليخدمون
وبسدها صير .. خادم امير
وخلي دم وريدي يسدد الدين
~~~~
من اشوف الدنيه ضدي
واحط ايدي اعله خدي
والهموم جبيرات شفتهن
اگلها يمه وينج
عليه ديري عينج
قبل ما اسولف گضتهن
البعازه ينخاها
مثل امه يلگاها .. عظيمه
قبل ما يمد ايده
تحط بيده اليريده .. الكريمه
لو عالوفاء .. تحجي النساء
من يوصل اسمها يسجدن عليه
ام الكفيل .. شي مستحيل
ما اضن منها ربك خالق اثنين
~~~~~~~
گمر وتلاثه اخوته
صفوا عالغبره موته
بشر جان يگلها وتگله
بعد لو عندي ميه
اوديهم هديه
ولا اريد المن حسين تخله
ولا واحد يهمني
اريدك تطمني .. اعله واحد
اجيت اسئلك وينه
عله ابني ابو سكينه .. من اناشد
لو مني راح .. معناها طاح
عمد بيتي وتهدم سگفه عالراس
لو گتلي مات .. شتسوه الحياة
وانه شعندي بيها غير الحسين
~~~~~
بشر حار بزمانه
وگف ساعه بمجانه
شيگول اذا ضاع كلامه
يخاف يگلها مذبوح
جسد عالرمله مطروح
بلا راس وسلبوها العمامه
بحوافر صدره متكسر
واديه بيهن نقص خنصر .. والعيون
بيهن جم سهم گاعد
رمل بيهن ودم جامد .. يشوفون
بنت الأصول .. نسل الفحول
المحيره المواقف وكت الزماط
بحالة ذهول .. مدري شتگول
دگت عله الراس ولطمت العين
~~~~
بعد سولف عليهم
نشامه وادري بيهم
يعرفون يجازون حليبي
وصيتي جانت الهم
نذر كون اربعتهم
يروحون للحسين حبيبي
اذا اريد افزعهم
صحت ها يا بعد امهم .. يفزعون
گبل صوتي لا يطلع
عد عينج انه اسمع .. يصيحون
وفوا رباي .. وتعبي وضناي
مربيتهم لخوهم ولدي خدام
يستشهدون .. يتگطعون
مثل حسين اجيبن گلي انه وين
رد مع اقتباس