قصيدة: طالع يباهل
الشاعر: ميرزا عادل اشكناني
: ليالي محرم الحرام
ليلة 1 محرم 1448 هـ
طالع يباهِل ابـْ كامل وَقاره
طَلعةْ مُحمَّد لهْل النَّصارى
لاچن طلع عطشان
باهَــل بني مروان
طلع طلعة محمَّد من تظلَّل بالغَمامْ
طلع طلعة نبي لاچن عله هيئة إمامْ
طلع گبل الحرب رايد يحاجِّج بالسَّلامْ
يسولف بالعقل تالي يسولف بالحُسامْ
لو تصفن إلها تعرف طَريقه
احسين او محمَّد نفْس الحقيقه
ابسورة بني عمران
باهَــل بني مروان
{ تَعَالَوْا نَـدْعُ } كلمن بابْنه يتباهل يريد
و أباهِل بالشَّهيد ابن الشَّهيد ابن الشَّهيد
أنا ابني الأكبر او ياهو ابْنك إنته يا يزيد !؟
من الكوثر بنيني و إنتو من ماءٍ صَديد
منهو اللي مثله لجْل الشَّريعه
ابكلشي يِضَحِّـي حتّى ابرضيعه
بوْلاده و الرِّضعان
باهَــل بني مروان
و إذا جبتْوا النِّسا وكْت التوجُّه بالدّعاءْ
نسائي زينب الماكو مثلها بالنِّساءْ
فرق بين العَلَمْهِن أحمر ابِّيت البِـغاءْ
منِ اهْل العِفَّه و الحجَّبْهن الله بالكِساءْ
أشرف نساكم هنْد او سميّه
و احنا نسانا ابنات الزچيّه
بام الخدر و الشَّان
باهَــل بني مروان
و إذا جيتوا بِأنْفُسكم تِريدون النِّزالْ
أنادي اِرْكب بِنَفْسِي يا گمر هاشم تعالْ
إذا عدكم أيادي للدعّا و الإبتهالْ
أباهِل باللي ما عنده يمين او لا شِمالْ
جيبو زلمكم او خلّي نباهِل
و آنا أنادي ها يابو فاضِل
ابخزرة گمر عدنان
باهَــل بني مروان
الحدث لو رد تكرّر يختلف تالي المَصير
النصارى اشْرف من امَيَّه اللّي ما بيهم بَصير
محمَّد من طلع رَد و اِهْوَه لبْناءه نصير
و أنا ابني من طلع ردِّيته مشيول ابحصير !
شاله اعْله صدره للخيمه جابه
الله يعينه الفاگد شبابه
و ابذبحة الشُبَّـان
باهَــل بني مروان
البتول امّي اطْلعَت لاچن تحِفها المِستحاةْ
او علي امباريها و امحاوطها من أربع جهاتْ
و أنا اختي الركّضوها آل اميَّه بالفلاةْ
بنات الزهره عگب الحِشْمه تالي امسلِّبَاتْ
شيْقدّم أكثر من تضحياته
او للباري ضحّه ابْهَيبة خواته
حتى ابسبي النسوان
باهَــل بني مروان
طلعنه أهل الكسا خمسه او رجعنه امأمِّنين
لچن يوم الطفوف اخواني كلها امذبِّحين
بِنَفسي چان أخويه او شفته مفضوخ الجبين
تركني او عالنهر تارك شِماله و اليمين
احسين ابْإباءه دين الله ما ذَلْ
يشبَه محمَّد يوم اللي باهَـل
بس مو بني نجران
باهَــل بني مروان
رد مع اقتباس
المشاركة الأصلية كتبت بواسطة أهل كايرو
