أهلاً وسهلاً بك زائرنا الكريم في منتديات درر العراق

في خلال أقل من ٣ دقائق بإذن الله ـ لغير الأطباء ـ وبشكل مبسط جداا .. هعلمك ازاي تتعامل - منزلياً - بثقه وبشكل علمي مع أشهر حالة طوارئ مهدده للحياه وممكن تسبب لاقدر الله توقف لعضلة القلب

وفي أحيان كتيره ممكن تتعالج بشكل طارئ داخل المنزل قبل الذهاب إلي المستشفي ..

••" غيبوبة السكر المنخفض "••

مريض سكر حس بـ ( ضربات قلب سريعه .. زغلله .. عرق .. رعشه ) قيستله السكر لقيته أقل من ٧٠ .. مثلا ٥٠ .. ولسه واعي وفايق .. كده هو داخل علي غيبوبة سكر منخفض

تعمل ايه ؟؟؟؟

•• احفظ الرقم ده ( 15- 15 ) .. يعني اديله ١٥ جرام سكريات سريعة الامتصاص و انتظر ١٥ دقيقه ..

»» زي ايه ««

•• ( معلقه كبيره سكر أبيض أو معلقه كبيره عسل أبيض او ٢٠٠ مل عصير قصب أو ٢٠٠ مل عصير معلب " مش دايت طبعا " أو نص can كولا أو بيبسي " مش دايت طبعا )

بس كده و انتظر ١٥ دقيقه

•• في خلال الانتظار ده ارجوك متقعدش تعبيه في سكريات اكتر من كده عشان سكره ميعلاش بشكل جنوني سريع ويعمل ارتشاح علي المخ

بعد ١٥ دقيقه هتقيس تاني وهتلاقي احتمال من اتنين

•• الاحتمال الأول : لقيت السكر كسر حاجز ال ٧٠ .. يبقي كده تمام اوي .. لو لسه معاد وجبته الاساسيه بعيد ياكل سناك خفيف من كربوهيدرات معقده عشان مبينزلش تاني ( ساندويتش بطاطس أو جبنه أو حفنة مكسرات او طبق صغير أرز بسمتي ) .. ويراجع الطبيب بتاعه في جرعات أدوية السكر بتاعته .. وألف سلامه عليه ..

•• الاحتمال التاني : لقيت السكر لسه تحت ال ٧٠ .. كرر اللي عملته تاني .. ١٥ جرام سكريات وانتظر ١٥ دقيقه وقيس .. السكر عدى ال ٧٠ تمام .. معداش ال ٧٠ .. كرر اللي عملته تالت .. لو انظبط بعد المره التالته تمام .. لو لسه تحت ال ٧٠ بعد المره التالته .. يبقي تتحرك علي أقرب مستشفى

تمام

•• طيب لو من الاول لقيت السكر بتاعه واطي جدا تحت ال ٤٠ .. أو خلاص المريض بقي مش واعي وفي غيبوبه ومش هيعرف يشرب أو يبلع حاجه ..

•• كده يبقي تتحرك بيه بأقصى سرعه علي أقرب مستشفى

طيب اعمل ايه وانا ـ في الطريق ـ بجري بيه علي أقرب مستشفى ؟

•• ارجوك بلاش تشربه سكريات بالعافيه .. عشان هيشرق ويختنق .. لو مش هتعرف تركب كانيولا وتعلق محلول جلوكوز وانت في الطريق .. يبقي معلقة سكر أبيض أو معلقة عسل أبيض تحت لسانه وبكرر تحت لسانه ـ متحاولش تبلعهاله بالعافيه عشان ميختنقش أرجوك ـ وسيب جسمه يمتصها واحده واحده .. وفي خلال ده انت بتتحرك بيه بأقصى سرعه علي أقرب طبيب أو مستشفي

.
دمتهم سالمين

....

طبيب/ رجب علي
دكتور القلب والأوعية الدموية