ـــــــــــــــــــــــــ ـــــــــــــــــــــــــ ـــ
القصيدة: غُربة راي
أداء:محمّدبَاقِر الخَاقانيّ
كلمات: عبّاس الشِبلاوي
ـــــــــــــــــــــــــ ـــــــــــــــــــــــــ ـــ
غُربة راي وليلك جاي
وحيرة مِن الحافر للماي
ـــــــــــــــــــــــــ ـــــــــــــــــــــــــ ـــ
وُدَّك تُغفه عيونك ساعة
بس ما تُرضه تنام جفونك
چي ما إلك خوّان تحرسك
هسّه إنتَ الحارس لظعونك
ثمانين مدلّل يم راسك !
بكل فزّة عين يصيحونك
متوسّد خدّك چف إيدك
و يم خِدرك گلبك وعيونك
يجيبك ويودّيك الويل..تصير إلمن يَـ المّالك حيل
وصيّة خوّانك بچفوفك..وداير ما ديرهن خيل
عِلويات..مرعوبات
هاي تسلّم الونّة لهاي
غُربة راي..و ليلك جاي
ـــــــــــــــــــــــــ ـــــــــــــــــــــــــ ـــ
الحال الـ بي عايش گلبك
أصعب مِن كسران الخاطر
حاير ومبيّن مِن وجهك
بس گوّة تبيّن مو حاير
تتلفّت والغُربة بعينك
ما تعرف شتسوّي وصابر
ايتامك يَمهم يردونك
وإنتَ تريد الـ جوّه الحافر
كل رمشة عين آه تزيد..تريد تروح وتُبقه تريد
خِدرك غالي وغالي حسينك..وما تدري برايك يَوحيد
بين حسين..وظعن حسين
حَيران ويا بلوة هاي
غُربة راي..و ليلك جاي
ـــــــــــــــــــــــــ ـــــــــــــــــــــــــ ـــ
مِن الطَف يِسلبك خيمة
وتنطيه فوگ الخيمة إخوانك
مجبور تبات بهالوادي
ولـ دمعك ما يكفي ردانك
تضم چلمة يا خوية بگلبك
بس تطلع گوّة إعله لسانك
چي متعوّد فيّ الخوّة
وهـٰذا مچانك موش مچانك
بصدرك تتكسّر چلمات..وما تگدر تحچي الآهات
مِن اوّل يوم لخمسينك..اوّل مرة بهيمة تبات
اوّل يوم..يـ المهضوم
يُمر إعليك بِلا حمّاي
غُربة راي..و ليلك جاي
ـــــــــــــــــــــــــ ـــــــــــــــــــــــــ ـــ
ما يحتاج تبيّن رُوحك
جِدمك سُولَف يَـ المّا تندل
المّا يعرف يمشي ويّ حباله
تُعرفه الوادم هـٰذا مدلّل
ضايع بالهيمة إنتَ و رايك
بيدك كلشي وما بيدك حَل
كل أكتار الوادي تلچمك
مِنّا خيمة ومِنّاكه التل
يَـ المّا تندل وين تروح..خطواتك ب الطف ب رُوح
كلشي مِن إيدك راح ب ساعة..مِن خيامك للمذبوح
فيّك طاح..و خِدرك راح
مِن فارگ چف السگّاي
غُربة راي..و ليلك جاي
ـــــــــــــــــــــــــ ـــــــــــــــــــــــــ ـــ
ينگال المضموم ب رُوحك
كون وتحچي لأهلك حالك
يدرون آثار البچفوفك
وجروحك مو مِن حبالك
كون تسولف كل جروحك
وتُوگف مِن تُوصل لخِيالك
يَـ المّا مرّ ب شوفك ظِلّك
تاليه يطلع يم چتّالك
كون تصير وتحچي الصار..تراويهم آثار النار
وتگلّ لأهلك مِن عفتوني..ما ضَل لا فيّ ولا دار
گلهم مات..عِزّنا و فات
وكت وصرت ب إيد إعداي
غُربة راي..و ليلك جاي
ـــــــــــــــــــــــــ ـــــــــــــــــــــــــ ــ
حدّك مو هـٰذا ويّ جروحك
تُكبر كلما تخطي إجدامك
محسّب كلشي يطيح گبالك
بانيه چنت ب ذيچ ايّامك
وكت الطيّح خيمة خِدرك
و هم يطيّحك مثل خِيامك
دام إخوانك مو يم ظعنك
و راية خِدرك مو گدّامك
لا تآمن عُگب الخوّان..لهاي جروحك يالعطشان
مو كلها وگدّامك حيرة..تبچّيك ب نص الديوان
مو لِهناه..حدّ الآه
گدّامك يَـ المسبي هواي
غُربة راي..و ليلك جاي
ـــــــــــــــــــــــــ ـــــــــــــــــــــــــ ـــ