القصيدة: يا روح حسين
أداء: مسلم الوائلي
كلمات: علي الأكبر الغرابي
~~~~~
ليش .. بعيونك هاي
ليش .. خجلان هواي
ليش .. ما تحجي وياي
يخوي .. يخوي
~~~~
مسرع من الخيمه جايك
ردتك وما اريد مايك
يا نهر عمري التبده
حيره يالعباس حيره
كسرتك كسرت عشيره
جرحك بيا دمعه اشده
عباس خويه من شوكت بالگوه صرت اندلك
يلما امطيح جلمتي شو هسه طايح كلك
عباس گبل بيا وكت صار السهم يوصلك
گوم .. ما اريد الماي
گوم .. وارجع وياي
گوم .. لخيامي افياي
يخوي .. يخوي
~~~~~~
يا ابو فاضل من وصلتك
انه اخوك وما عرفتك
صوت المناشغ خذاني
عيونك الحلوه شعماها
ويا سهم بايگ ضواها
وماخذ بعينك مجاني
مو زين اخوك بروحتك واحواله ماهي اطمنك
ما شابعه عيوني بجي معقوله تشبع منك
واحلامي ادورلهن عذر لمن ينشدن عنك
شوف .. يمك ذبلان
شوف .. گلب العطشان
شوف .. حسينك خلصان
يخوي .. يخوي
~~~~~
انه واگف خويه يمك
وگفت اهلال اعله جسمك
وما درت عينك عليه
تبجي وعيوني بجتلك
واركب بنفسي گلتلك
وامسح دموعك بديه
بعيون اخوك شگد حجي ولساه عيونك تخجل
بجيتني بگد العطش حد ما دمعهن وشل
يالظهري خويه بطيحتك مايل وما يتعدل
مات .. يالغالي وياك
مات .. گلبي بفرگاك
مات .. عمري بلياك
يخوي .. يخوي
~~~~~
حسينك اليمشي بوريدك
بيده رايد يلزم ايدك
وانظر جفوفك گطيعه
امنيتي من گبل المنيه
موتتك ما بين اديه
مو تموت اعله الشريعه
عباس كلما حاولت ادنه وشبگ جسمك
واتمدد بطولك ردت وجفوف اديه اتضمك
شفتك جرح شابگ جرح خايف جفوفي تلجمك
راح .. عطر الأنفاس
راح .. جف الينباس
راح .. طولك عباس
يخوي .. يخوي
~~~~~~~
خويه لتخليني وحدي
هو جم عباس عندي
التارس اخيامي بأمانه
وزينب بيا حال اگلها
راح اخوها والكفلها
المحد يعوض مكانه
لو اموت لو وياك ارد عباس لخيام اختك
لو تنصب يا ابو فاضل فاتحتي مو فاتحتك
لتخلي اخوك الوحده متحير بسالفته
روح .. يا روح حسين
روح .. وبلا جفين
روح .. سهمك بالعين
رد مع اقتباس
