انه وانت ثنينه بيك التهينه
جرف وطيوفه عشب
جان غافي بكلبي سباحة ذهب
توه سومر جفنه فانوس الدرب
الجنت اشوف عيونه بالظلمة مشاعل
باكته مني البلابل
وفاركيته هلال نعسان على غيمه
ومن ورى الشباچ شفت الوطن هيمة
ذبل بستان الحلمته وانكسر ناعوره
الجنت ادك بابه بجنح عصفورة
عافني مراية عرس مكسورة
والبرد بلل شمسنه وما درينه
انه وانت ثنينه بيك التهينه
وانتظرتك ..
ساجد على اثار جدمك
وصاحت الحساد كافر
حرت واصنام الشوارع
دينهم ما يقنع باثارك على الطين جامع
وانت ذاك
المن دلع زيجك لكينه هلال كلمن عيده ضايع
وين رايد… وليش رايد
مو جنت يمي شريعه
وماينه على النهر زايد
انكسر معضد الباب
وجزت خزامة وكتنه
وانكسر جنح القصيدة
والقصيدة هلال شاعر
يا زازير المحاجر
ليمته نرد للبيادر
وحنه احلام الضفاير
لكطت بخدي المكابر
وخنست بزنجارها النجمة
الكمر ذباح ماين
وعله طوفة طين سمره
خايفة طيور المكدرة
بالقفص محبوسة شجرة
وجزة ورد الماي طيف الساجية
جزة من شاف العمر مهدوم سدة
وصوبخت توهه الشريعه الرايجه
واعترف مهزوم اجيتك
روحي عثرها انتظارك
ودفو الواهس برد من سومر جناغك
وعلى متون المغربية
زلف غصن التين ذبني
وياهو البحالك يزنجار التراچي
ظلت توابيت مهجورة السواجي
الصيف كوض
وما رجع طير الخضيري
وانه خايف ينطبك شباج عمري
وينفتح شباج غيري
حيرتني
وخنجر اسود لاح كلبي
وكطع كل عروكه
والحزن سواني فرجه
ياكمر يل ما حسبت حسابه لجمه
انا يمغنج
احسنك وياي
انت كون بعيد كلي
ياهو هذا المن اصيحه يكلي جاي
رد مع اقتباس
