قصيدة [ شال الهوى الهاب ]
أداء: الحاج باسم الكربلائي
كلمات: الشاعر ناظم الحاشي
المكان: حسينية عقيلة الطالبيين (عليها السلام)
الكلماتشال الهوى إلهاب من خدّك إتراب
لَرْض المدينه وَصّله وإشتَمّه جَدّك
شال إيده لِلّه دَم مطرت إوياه
عين السِمه من شافتك عالغَبره خدك
بِچَت عينه إبغَزاره إو إلك أدَّه الزياره
----------------
أخَذ من خَدّك الجدك
عُطُر مَنحَر وَريدك
بِلا رحمه يبو الرحمه
عطش ذبحو شهيدك
حِچاله المَر على أطفالك
بَعد مَقتَل عِضيدك
إوبيدك من عِصه الخاتَم
اوگَصّو إصبِع إيدك
سولَف على الخيل من داسِتَك حيل
وإتلاگَت إبنَفْس الجرح كِلها الحوافِر
من يحسِب إجروح روح النبي إتروح
الف اوتِسِعْ مِيّت جَرح وإعليها صابر
شَخُص موته إختياره إلك أدّه الزياره
-------------------
بِده إيسولِف خبر قصتك
رَغِم ماجدّك أدره
گلّه المَر على حسينك
صعب يتسولَف أمره
من مثله انذبح طفله
عطش ماي إعله صدره
طفل وگبال عين أمّه
إبسهم ذبحوله نحره
رَد بي لِلخيام وابمنحره اسهام
عبدالله عطشان إنذبح اللهُ أكبَر
زينب تِحاچيه عن أمّه غطّيه
ماتگدر اتشوف الطفل گطعوله منحر
طفل شاف المراره الك أدّه الزياره
-------------------
إلك من قَدِّمَت زينب
جَوادك للمنيّه
اوبِدت تشتم عطر صدرك
اللبوه الهاشميه
هاي الروحَه گالتلك
بعد مابيها جَيّه
عليك بداعة الزهره
يخويه اترِد عليه
بين اعظم اثنين زينب والحسين
آخِر وِداع اتوَدّعك يالعَنها راحِل
گِتّلها تدرين مايبقه كل دين
لومه الذبيح المِنذِكِر بالايه نازل
ذبيح الله ابقراره إلك أدّه الزياره
----------------
عِفتها اوشافِتَك تمشي
لخوك إل عالشريعه
اوشِمَرْت إعمامتك شافت
على الجثه الصريعه
صحتله إبعازة چفوفك
يبو چفوف الگِطيعه
الوديعه الچِنّه نحميها
بَلا حامي الوديعه
هذا إنته عَباس جثّه بَلا راس
دنَّگِت يم جثته اوصحت وينك عِضيدي
گوم إگعد وياي رِد عَنّي إعداي
والگِطعو ايدك عالنهر گطعولي ايدي
هَلَك بَعدَك حيارى إلك أدّه الزياره
-------------------
دِخَلتْ المعركه الوَحْدك
أسد ذبحو فصيله
وصحت بسيوفها اخذيني
شهيداً في سبيله
تمشي اوتلتفت عينك
على اخيام العقيله
بِت أشرف قبيله اتضل
اسيره ابلا قبيله
رَغمْ العطش ذاك وامكاثَر إعداك
لا والله من سور الحَرَم مايدنه كافر
من كل الاصفاح مِتحمّل ارماح
واتنادي هل من ناصرٍ ماتلگه ناصِر
بُقه الدين إبمساره إلك أدّه الزياره
-----------------
تنظر عالشمِر زينب
تربّع فوگ صدرك
رُفَس جسمك ولاهابك
وظرب بالسيف نحرك
داس ابرجله الاعمامه
اولزم بچفوفه شَعرك
اوعزل من الجسد راسك
ألآ لله أجرَك
إبْلا سَرِج وإلجام وإمتَرَس اسهام
الميمون عاد اعله الخيم واحسينه ماعاد
من شِعلو النار بخيام الاطهار
فَرّن بناتك عالارض وصياحي مافاد
ضعن هاشم اسارى إلك ادّه الزياره
-----------------
ماضل شي أبد مِنّك
جَسَد وإمگَطّعينه
على السبعين الف جسمك
كأنّه إموزّعينه
وخيل الداستك شالت
حوافرهه اللعينه
بقايه إعظام الْ ابصدرك
العاري إمكَشّفينه
جسمك بَله إغطاك والحَر گصه وياك
مارضو جسمك يندفن عالغبره عاري
وإختك والايتام گادوهه للشام
اونهر الفرات العَطّشك ضل مايه جاري
ضِمَت يَمّه الغيارى إلك أدّه الزياره
--------------------
سَلام الله على جروحك
على الدم النِزَفته
سلام الله على روحك
على الصبْر الصُبرته
سلام الله على صدرك
على الدوس الحِملته
سلام الله على نحرك
على الموت الجرعته
دمّك يضل صوت دَم يرفض الموت
والتختِنِگ منك هوى تِشتَم هواهه
حي بعده مامات إسمك بُقه إثبات
والدم على السيف إنتِصَر هَذا عُلاهه
عِلَن بيك إنتصاره إلك أدّه الزياره
رد مع اقتباس
المشاركة الأصلية كتبت بواسطة أهل كايرو
