السمار الحدر من عيني اثاري انت
وكل ليله افز بيها مهر معذور
رد خايف وراها انت ..

لچن لسه على محرابي اخط اسمك
واجز بالناس ..

امس ضيعتك بروحي
لجن طولك جدح بالكاس

ولك عمري نذر بالسچه متبدي ضوه لكل جاي
ساعة يدلي بالماشين
ساعة يصير للحدر الشمس نايم برد وفياي

وانت الما تود ملگاي
تيه واعثر بعيني واحسبك جاي
تلكاني افز على صوت
احضرلك هله وذرعان
وانكل بالستاير عود اكض الريح بالشباج
والكه مبسط المنهوب بالبيبان
انا وياك مثل مرايه ومرايه
نتلاكه بلايه رسوم
مابينا اليرد سالم بالمكاون
لو ينسحك لو مثلوم
البري بينه على الحيطان ظل معدوم

وقريش تسودنت
والغار يطردني لحد اخر نبي بروحي
وارد شارد

اطب ياغار
انا بجفي نساوة دم
لجن مو ثار

يمته احضالي ببنادم
يشوف النار البروحي
ويهيد ابرودة ابراهيم

واجيت العينك من التعب للحرمان
وضكت جرفين بعيونك
جرف متشضي لاحه الماي
وجرف متروَس ناس بحجه انت فياي
ولك تطرد
ولك كافي تساومني على دموعي
ولك كل الضوه بدربك
لجن عينك على شموعي

وشكو مرايه تدليني بحزن روحي
ضوه حزني ولا ينظم
مثل ذاك الفراغ التارس ضلوعي
ما بسك يرب شوفي
صرت يمهم مدينة افياي
اشوفن ناسك بلا راي
واحد طاب واحد جاي
شمالك ثوبت روحك نذر يم كل مدينة فياي

واضم كل صفنة بيها انت
واضمك لا يجيسك شوف
واشيلك علك يم كل خوف

ما تتعذر ومعذور
امس من رحت بجدامك ولا مجتوف
ولكيت الشمعه موسم شوف
والصفنة دوه لكل حاب
والشباج مرغوب اكثر من الباب
واغني اسمك
واضمك بالزوايا التارسة الكيعان
وارد الكاك نسمه بظهر كل شباچ
يذبحها دفو البيبان

ما ودك تخليني كلايد جيد
حطني بطرف خشمك حتى لو خزام
ولك ياطين كافي احتاملك تحتام
لو ينفع حزن روحي هدايا انطيه
شكو نيشان برسومي
ترى منك يبزر ادم فلا حاجيه
واجيتك بالمطر واسمك على زنودي
حبر لا طاح لا شلته
ولكيت بعينك شكد طين غيري عناد شايلته
كل هذا وبعدها عيوني طيفك ما مفاركته








محمد رزآق الغزي