اليوم دكتورة اسنان اخذت قلبي
السلام عليكم دررنا الغالين
طبعا صارلي شهر سني يوجعني من اكل عليه
وكلما اريد اروح الى طبيب الاسنان ميصير عندي مجال
البارحة واني اتصفح بالفيس شفت اعلان ممول
حشوات اسنان مجانية
تواصلت وياهم طلعت بنية
كتلها شعجب تحشون بلاش شتحصلون
كالت احنة مجموعة طلاب وهستونة متخرجين ونريد نضل مستمرين بعملنا
على ما نلكة تعيبن
انت راح تدفع بس خمستالاف مال حشوة
انطتني موعد اليوم ساعة 10 الصبح
رحتلهم الشارع فلسطين تلكوني اهلا وسهلا استريح
افتح حلككفتحت حلكي فحصو سني وكالو فعلا يحتاجلك حشوة
هسة بس يفرغ واحد من الدكاترة يشتغلك
اني هنا بقيت اچيك بالموجودين
كلت بس يجيني دكتور يشتغل سني
اكلة بطلت ماريد
لأن الولد اديهم ثكيلةوخاف يصكط سني
واباوع واذا بدكتورة تكلي انت فقار
كتلها اي كالتلي يالا تعال
صعدت عالسدية هاي مال الاسنان
وبدت تشتغل
حاولت اشوف اديها ما كدرت لابسة چفوف
اباوع جوة لابسة حذاء وجواريب
لك هاي شلون ورطة
اباوع منا لابسة ربطة وخانكة نفسها ماطالع منها بس وجهة
كلت يالا هم انعم الله خل اباوع على وجهة حتى ما احتاج البنج
هناك جان تلبس كمامة
حظ المصخم بقت بس عيونها طالعة
كامت تشتغل واني اباوع بعيونها
جان تكلي غمض عينك
كتلها ليش
كالت خاف تصير بيها شوائب
اني ادري بيها تكذب بس غمضت
الصراحة قهرتني بعدها مستجدة
وخايفة
لهذا وضعها هي وتشتغل بسني مدري شلونة
بحيث مردت جتفي وشوية من صدري
هي جاعصتني اجة بيت شعري بلساني
كتلها
بس من رخصتج نعست
دكتورة شو كلش دخت
بسني الالم و الرحات
شو هسة احس تكسرت
ضل جسمي يرجف بالعجل
مو ببرة احس تبنجت
جان تشيل ايدها مني
كالت اني هم شاعرة
خل اجاوبك
كالتلي
يا ولد متكلي شبيك
جان القصد اداويك
صفيها نيتك لا تضل
تتحارش اعرف ماضيك
دكتورة اليغثني ترة
بتنور نار و اشويك
هنا كامت تهدد لازم اجاوبها
كتلها
ميخالف اقبل انشوي
وبنارج الحلوة انكوي
وسنوني هم فدوة الج
لخدودج التضوي ضوي
اباوعلها جمرت
جان تكلي ..
مو كافي احسك لحيت
و ساعة تباوع ضليت
خليني اكمل حشوتك
من عندك اني مليت
شفتها ضاجت وسني بعدة مكملان
كلت خل اسايسها خاف تعوفني عالنص
واروح العيادة بالحارثية اذبلي 100 الف
كتلها
مشكورة جدا واعتذر
وياج جنت اتشاقه
من شفت طولج مابقت
ولا قطرة ضلت طاقه
انتي انتمائج اعتقد
للورد جنج باقه
لو اهلج وينطوج الي
ذهبج تحملة الناقه
اباوعلها ضحكت من ورة الكمامة
شفت عيونها انعقجت
معناها ضحكت
جان تكلي
ما ضجت منك لا ابد
و ادري جنت تتشاقه
هو البشر ما ينلزم
اتلزمة بس اخلاقه
كتلها
اخلاقي ما توسع بحر
بس نمتي فوك افادي
نص ساعة ساكت مكدرت
گلت الله جاب مرادي
كالتلي سد حلكك عاد خل اكمل
اسدة شلون تشتغلين
كامت تضحك وبدت تشتغل
وكلساع تكلي غمض عينك
واني هم كل شوية اعض اصبعها
عاد كملت سني الحمدلله واخذت رقمها
كتلها حتى تسويلي كل سنوني
ودعيتها للمنتدى وراح تسجل ويانة حتى تسوي سنونكم
خاف واحد يرادلة حشوة قلع زراعة اني اتوسطلة
وبلكت الله تصير القسمة ادعولي
رد مع اقتباس
المشاركة الأصلية كتبت بواسطة أوميد
