جبت عمرك ركض/ ومسابك الريح
وطكات العظم / تحسبها بالريش!
/
الشمس فوك اعله راسك / راحت اتطيح
وتقشمر روحك / إمن إتصَيح إفيشش!!
/
جرجرت الدرب // جر المراجيح
تعارك بالتعب / حسبالك اتعيش!
/
تلهث ماردت /// ضِل التراويح
وبروج المتاعب / فايض الكيش!
/
تالي افلوس تعبك / عنك اتزيح
والما تعب بيها /// ايذكرك إبيش؟
/
وعلي لو تبجي/ بدموع التماسيح !!
متحامي البنيته // ايلوحه تفليش!
/
الموت ايسرحك امن الدنيا تسريح
مثل جندي / وبعد ما تبقى بالجيش!
/
اعذارك ما تنفعك / لمن اتصيح
ولا تنفع معارف / لا بخاشيش!
/
افلوسك بالقبر / مابيها تصريح
وجيوبك بقن // ويه الدشاديش!
اجيوبك بقن // ويه الدشاديش!
حسين االساعدي