شسوة بيج الشام
حمزة السماوي
ليلة 27 محرم 1448 هـ
حسينية صاحب الزمان عج النجف الأشرف
شسوه بيج الشام
شلون بي أيّام
زينب انتي شكد كبرتي
من دخلتي الشام
////////////////////////
الزهراء وصلت الشام ابواجيها
تعاين بالقصر زينب اموكفيها
لطمهه صار عالسطره التاذيها
يزينب بنتي زينب ما تشبهيها
بكثر ما باجيه اعيونج دمه اعليها
بكثر ما واكعه اضلوعج كسر بيها
ادموم كلهه الايد
شجابج اعله ايزيد
شلون وكفه والله وسفه
اوجوه صلفه الشام
////////////////////////
رحت عنج زغيره بخمسة اسنينج
اجيت اليوم شفت الناس سابينج
شسحكتي بكربله ومحتركه رجلينج
الخيم معناها طفيتيها بيمينج
واكو شي لونه احمر فوگ جفينج
عرفته هذا دم من منحر حسينج
ليش زينب ليش
حرمه وبنص جيش
صوت يعله شلون عدله
ماكو مثله الشام
////////////////////////
علي السجاد اسمعه عليج يتحسر
وجه عماتي من الشمس يتفطر
ضعن لو هذا جسم حسين واطشر
ثلث تيام زينب واكفه بالحر ؟
اذا غطيتي وجهج ينشتم حيدر
واذا تكعدين سوط عليج يتكسر
ايصيح بس تبجين
اهز راس حسين
حتى ألچمه ويجري دمه
بلايه رحمه الشام
////////////////////////
يشمروج بحجر وادموم تتبده
يدگون بطبل والوادم امعيده
ضيم الشام ياهو اليگدر ايرده
ولا طوعه اللگيتي الشام بس جعده
حجي النسوان وحده تسولف لوحده
اخوها اليحمي ظلها اجفوف ما عنده
فوگ رمحه الراس
ودم بجه العباس
باعتذاره وانكساره
ماله جاره الشام
////////////////////////
اشوفج ليش وجهج منخطف لونه
بطشت زينب شنو الرايح يخلونه
الحسين بطشت راسه وفاتح عيونه
يزيد اگبال عينج كسّر اسنونه
صرختي عوفوا اخوي ولا تضربونه
شنو مو كافي بالحافر تسحگونه
الخيل اخ الخيل
من العصر لليل
اتدوس جسمه وتدعي امه
كون تعمه الشام
////////////////////////
الشام شضامتلج بعد يالحره
بخرابه لا سگف لا باب متحيره
رقيه تگعد من النوم بالحسره
تريد حسين يرجع هسه من گبره
جابوا راس ابوها بشيبته الحمره
التموت عليه راح تموت يم نحره
من رقيه تموت
والطشت تابوت
تغسليها وتدفنيها
تبقه بيها الشام
////////////////////////
اروحن هسه يمه بس الي جيه
لقانه يصير يوم الاربعينيه
انه وياج مسبيه اويه مسبيه
نرد راس العزيز لنحر راعيه
تگليلي ييمه عايني اعليه
واگلج يمه هذا الشام تاليه
واحنه كلنه اجروح
للمدينه انروح
اويانه تربه كلشي غربه
ذكره صعبه الشام
////////////////////////
يزينب انا يَمَّج بيج مسؤولة
بجروحج بالسبي يبنيتي مشغولة
و اذا تسألين حيدر وين مذهولة
حضن راس الحسين و دمعته بطوله
علي تحَيَّر شنو جان الحجي يگوله
يبوية حسين انته حسين معقوله
حسين تحجي دماه
آه زينب آه
وين جِنّا وين صرنا
آخ من الشام
رد مع اقتباس
المشاركة الأصلية كتبت بواسطة عشتار
