أين استقرت دمعتك
حسين مردان البديري
ليلة 27 محرم 1448 هـ
حسينية صاحب الزمان عج النجف الأشرف

أينَ اسْتَقرَّتْ دَمعِـتَك
يا صاحبَ الزمان
*******************
بْكِل وقِت تنظُر حُسين ابْلا مُناصِر
بْغُربِـتَه ودارَتْ علَه اخيامَه العساكِر
واِنته عِشْت الغُربَه لاكِن بالمَشاعِر
أبِرَضوىٰ أمْ طوىٰ تِجرِي المَحاجِر
يا گاع حِمْلَتْ حسْرِتَك
يا صاحبَ الزمان
أينَ اسْتَقرَّتْ دَمعِـتَك
يا صاحبَ الزمان
*******************
لكَربَله تِمشِي ابگلُب عالِي نَحيبَه
تِصبُر اِعليهَا يبو صالِح عَجيبَه
تْشُوف گبْر احسِيَن چَن جِثَّه سَليبَه
تِلتِفِت تِلگه أثَر ظَل للغَريبَه
للـتَلْ تِروح ابعَبْرِتَك
يا صاحِبَ الزمان
أينَ اسْتَقرَّتْ دَمعِـتَك
يا صاحبَ الزمان
*******************
بِالنَّجَف تِبچي قُرُب حامِي الحَميَّه
تْعزّي جَدَّك حيدَر ابْهاي الرِزيَّه
وْ تِدخِل الكُوفَه اوْ تجي ابّـالَك سِبيَّه
تْـيَسِّرَت بيها الأميرَه الهاشِميَّه
تْسَلِّم عَليها ابْخَـنْـگِتَك
يا صاحبَ الزمان
أينَ اسْتَقرَّتْ دَمعِـتَك
يا صاحبَ الزمان
*******************
بْمَسجِد السَّهلَه دعيت الله ابخِشُوعَك
حتّه يتعجَّل يبو صالِح طِلوعَك
وبعَد بالغُربه فلا تِجرِي دِموعَك
ثارَك وثار اهلَك اتجِيبه ابرِجوعَك
طالَت علينَه غيبِـتَك
يا صاحبَ الزمان
أينَ اسْتَقرَّتْ دَمعِـتَك
يا صاحبَ الزمان
*******************
مِـثِل ما تِـنتظِر تِظهَر يَـالمُغَـيَّبْ
گلُب عِدنه من جِفاك اشگد تِعذَّب
نْواسِي گلبَك بالعَزَه وهالدَّمعَه نرغَب
يا غَريب اشگد بِچيت لحال زينَب
بالغربَه ظلّت عَمِّـتَك
يا صاحبَ الزمان
أينَ اسْتَقرَّتْ دَمعِـتَك
يا صاحبَ الزمان
*******************
بالغُرُب گلبَك منو يمَّك يِصَبرَه
نْواسِي رِدنَه وكِل مُحِب يلطُم بْصَدرَه
نِعتِـقِد كِل مَجلِس ابدَمعَك تِحِضْرَه
سَيِّدي ابهالليلَه مِنّك رِدنَه نَظره
تْفَضَّل عَلينَه ابنَظرِتَك
يا صاحبَ الزمان
أينَ اسْتَقرَّتْ دَمعِـتَك
يا صاحبَ الزمان