درر العراق

عماد الحمزاوي · 21/October/2013

دارمي عن الخيانة الحب الوفاء الدموع اللهفة الشوق دارميات حزن

((الشوق))

نهدين شوك الليل ,, صاحبها محروم ,,
كل شوغة من تثور ,, تصعد عالنجوم

,,,,,,

(( التفكير ))

كل ما افكر بيك ما ادري شيصير ,,
بس هيج احس بالروح تندك بسامير

,,,,,,,,

(( الخداع ))

يمته الصدك الكيه .. يمك واسمــــعه ..؟
جفنك جفن تمساح .. من ينطي دمعه

.,,,,,,,,

(( التشكي ))

كونك صدك من جيت تنشد علــــــيه
وي هسه 10 سنين جر ضيمي بيه

,,,,,,,,

(( العتاب ))

ها لو صدك مشتاك جيت وتعنيــت
تشعل هلاهل شوك يم عتبة البيت

,,,,,,,

(( النسيان ))

اشكيلك وميفيد ... وجهين الك دوم
ولهذه راح انساك .. وانساها الهموم

,,,,,,,

(( الجرح ))

يالمعتني اعله الروح تجرحها وك ليش ..
جرح اليصيب الروح يتضمد ابيــــــــش ..؟

,,,,,,,,,,,,,,,

(( التلون))

انته شكثر بذات .. وتراوح وياي
بالعشك ما مفهوم يوميه الك راي

,,,,,,,,,,,

(( الوفاء ))

ياما وفيت وياك ...وشكد تعنـــــــــيت
هسه اني بيد الموت كون انته هميت

,,,,,,,,,,,,

(( الحب ))

كل ما احس تروح ...من عندي الاكيك
كاعد اباب الروح ... وتكلي اتانيــــــك ....

,,,,,,,,,,,,,,

(( الانتظار ))

يا خلي مو تسعين .. لا مو الف عـــام
منتظرك وما جيت من عصر الاسلام

,,,,,,,,,,,

(( الخذلان))

كافي السحك بالروح ... مو طلعتـــها
ما خذلتك فد يــــــوم ... ليش اخذلتها

,,,,,,,,,,,

(( حرقة الشوق ))

من كثر ما مشتاك كمت اهجس الروح
صيدة جرح تنعاف لصغار الجــــــــروح

كونك تحس بالشوك .. وبناره والاه

جان اعله نار اتبات وتصيح اشاه

,,,,,,,,,,,,

(( لهفة ))

يالجيتني من بعيد ... وكليبي يمك ..

حاير اطلع الروح لو بيها اضمك ...

,,,,,,,,,,

(( عتب الفراق))

داريتك وداريت .. كلمن اجه وياك ...

تاليها عني تروح وجزاتي فركاك ...

,,,,,,,,,,,,,,,,,,,,

(( دموع الحب ))

اسمك زرع بالروح ... يكبر عالدموع

حد ما صبح بستان .. ما بين الضلوع

,,,,,,,,,,,,

((حيرة ))

حاير صرت بجفاك .. ما بين امرين

لو كلبي هذه يموت لو تنعمي العين

,,,,,,,,,,,,,,,

(( عتب المحب ))

كونك تعوف الناس كلها وتجي هنااا

يم خلك اليهواك مو تكطع ويـــــااا

,,,,,,,,,,,,,,,,,,

(( صعوبة النسيان ))

سهله وحك عيناك تنساني انتـــــــــــه
بس كلبي ينسه شلون وانته السكنته

......................

(( محبة ))

هاك اخذ ماي العين لا هاك العيون ...
افكسها لو صديت يالدومك تمـــون

,,,,,,,,,,,,,,,,,,

(( سهر ))

ها ما تجي ها جيت .. صايرلي يومين
سهران افكر بيك .. يا كحلة العيـــــن

,,,,,,,,,,,,,,,,,,

(( كرامة ))

جي درت انته العين ,, راح امشي عنك ,,
رغم ادري بين الناس ما الكه مــــــــنك

,,,,,,,,,,,,,,,,,,,

((اهات ))

اه شكثر بالروح شوك الك شايل
شوك الغريب العاش بين الرسايل

,,,,,,,,,,,,
((حنين))

حالي بعد عيناك ...مثل اليطارد
فوك الجمر وجدام رجليه كواغد

,,,,,,,,,,,,,

(( ترحيب ))

اهلا وسهلا بيك ما صدكت جيـــــــت
كلبي وعيوني تصير ياغالي الك بيت

,,,,,,,,,

(( انتظار وتمني ))

منتظرك وعانيت من طول الغياب ..
يمته تمر ايديك ... وتفرح الباب

,,,,,,,,,,,

(( دموع ومفارقة ))

خلصت حسبتي وياك .. يا وردة الحي
البحر من فركاكــ.. من عيني اخذ مي

,,,,,,,,,,,
(( لوعة ))

نار اعله نار الاه ومكاسره بنار
تطفه اذا مريت لو حتى خطار