صهيل إيوج حنين الخيل بالظلمه وطـن
إو صهيل الياخذ إجفوفي اغاني الريح بالكـَمره وطن
إو صهيل إيوج قميصك. شوف لعيوني وطن
إنتَ الوطن كل الجروح إستاحشن وطن .. وطن
دخـّن دم بصابيعي وطن
مهر مجنون ياخذ كل إصابيعي وطن
رياح الموت تاخذ كل حلم بيك , امتحن
إصابيعي على ترابك جمر يضوي إو حنين
الحلم غبشة إو نبع جرحين
الخوف مامش حجر يلين بجفي ساعه إو ما يلين
ولك ليلك صخر .. يتنفس الميتين
دم يابس على النهدين. النفط جوع .. إو خبز طين
صراخ إيهز ظلام الليل كـَمريه ... لـويـن!
إليموت إعله الجبل.. يمشي بضميره إو ما يلين
إيديك إتفك حزن كـَلبي الحزين
إيديك إتمس ظلام الروح مذعورة لوين تروح كـَمريه
إوصهيل الخيل هيبه إويعدل الخاطر وأحن
خايف عليك إو من دريت إشلون أحن
خايف .. برد ت إجفوفي حزن
إنتَ الوطــــــــن
إنت طول السيف... بالروح إندفن
حزين الماي بعماقه
حمام إينوح باوراقه
نذر روحه إلعراقه
إوجّن إجروحه البعيدة إهناك بالظلمة : حصن
إلك صوت اليجي إمن بعيد يشعل اسراري وأحن
أوف الجروح إستاحشن وطن ... وطن.......
دخـّن دم بصابيعي وطن
ياهو إلعلّم أنهارك على الذلة
غضب كلّش فراته.. إودم صرخ... دجلة
كـَبل الغبشة مهر الليل يخطف بالدمع كحله
علّمني ليش الهجر وكت الوصل يحله
أحلم بيك وتسله
ذكرتك ياعلي(1)
إبثكــَل الليالي السود
ها لنك حنين الكل فرح منشود
كل الجروح إتهيم بجفوفك فرح وورود
بس ذاك الجرح ..آخ.. إنتَ.. إتعرف ذاك الجرح
عنيد إيصد ظلام الريح كـَمريه فرح خضره إو يعود
هايم يوّج بالنزف مهره إورسن مهدود
كل ليلة أبات إعله الجرح مشدود
آخ... لا ظلمة تضحك بعد لا... ولا....
ليل الديوانية.... كـَمرها ..... إيعود
مذعور الشـَعر درويش عنيد إو ياخذ الظلمة لهب ويزود
عالماي إنكتب إسمه.. عزيز.... إبكل حلم موجود
يهيم الصوت بجفوفه اغاني إتفز عليها إنهود
إو يطيح إردود نزيف إعله الرصيف إو نهر ممدود
كلْما بجيت إعليك تحله
ياهو إلعلّم انهارك على الذله
وطن والدم..... إلك شعله
ياظلمة الموت ياجمرة إصابيعي ياريحة الدم يازمن مهجور
ياوحشة ليالينا على إجفوفي جثث وكـَبور
ياحجرة إمي الحزن بيها كفر ونذور
ياشبيج حزن من نور
ياهيبة كـَبر شاكر(2) بدر تحزن عليه إبدور
يامشحوف... واكـَف... عالثلج... ناطور
إجفوفي ياخذها.. النزف كـَمره إو حزن وطيور
عــــــد عيناك
نجيب الكـَمر.. للنهرين.. كـَمريه.. إو نثور
نحط الشمس بالظلمة بخور
يخضر الجبل من يهتز الهور
وحكـَ آخر نفس يهيم إعله الوطن منذور
أبد والله مايطفن لياليك على إجروحي سنين إمن الجمر
والريح صوت أوكـَع بيديك إوما اطيح
الريح...... دم......... للريح
أهيم.. أحضن لياليك سفن وانهار
تتشابج معانينا .... ذبح أسرار
أصير إمن الفرح إنتَ وأشتـّم روحي خاف إتكول
هذي الكـَمره ياخذها الحزن ... للدم
نهر أزركـَ أخذ مشحوف عليك إو بيك يتحلم
عليش الناس ما تلتم ... إو عراق الد م.
شهيد.. هناك.. عالرمحين..سابح بالنزف والدم
نهار إبعيد بعيونك غـيّم بالحزن دلهم
يطيح الدم كـَمر عالكـَاع يضوي الدم
لمض دمع الحمامة إعليك كل دمعة صبح أظلم
وحشه إو صدرك يدخن حنين إو هم
ميت تلمض اجفوفك تكـَول:
السيف من يشهكـَ يطول
مهره يعركـَ بالفضول...!
من هور الجبايش ما وصل طارش شهم مرسول
كلّش بعيد الدرب.... وحشه إو كـَصب مسلول
ظلام إو هامن إجفوفي كـَمر مهره
إو شهيد إبفالة إلا نذال مقتول.
نزيف إيهيم بالظلمة.. ورد.. وج باللهب مغسول
يفز جوع الليالي إبكل طفل مشلول
إجفوفه إتموت وعيونه بعدها إتكـَول
ذاك إنتَ
ذاك أنتَ نهار إبعيد تلمض من وره الظلمه إو تجول
أمد روحي درب مجهول...!
هايم وجنّ إجروحي مشاعل تدوي كـَمريه إو تصول
عراق.... عراق إنتَ....
إو أغانـّيك..... لصهيل السيوف...... إخيول