ماني گتلك ...
كل نجم تعثر مشيته يطيح من عين السمه
ماني گتلك ...
المزنه ما نفهم عشگها تغني للبيده بمطرها
وهي كاتلها الضمه
وانا علمتك گبل لا تجفي بيك
من تشوف نهيدها الشامخ تحدر
لا اتعب عينك وخاوي العمه
الميت يعيش اعل كيفه
يموت المفارك ضريح بعينها
الوردة من ينجاس خدها
إتل خصرها وتستراح بطينها
وانت .. انت ... انت جاسوك وطفيت
انت ... ضحكولك نسيت
انت منهم ...
انت لولولك بمنجل شرعت نوم الله يمهم
كل قصيدة التعگد رموش العذارى انطشها يمك ما غفيت
كل دكاكين المدينة تبيع قصتي بسالفة الما لمها بيت
كل عثگ يغوي بخيالي بسعفة منك ما شريت
لا تظن الجيه للمحتام سهلة
ما يصير نعدل المِيت ونكتله
وما يصير نجمل الغركان كذلة
وما يصير نسولف الغربة اعل دجلة
انا ابن كاع وفقير ومن لگيتك
كل جنح مكسور حلفته يطير
آه يا حيرة الطار وما لگه لجنحه سمه
اصفى من نيته الشراع
وآه يا حيرة الحط وما لگه
متانيته كاع
گلي وين نروح والظلمة صور
الدنيا ليل وكلشي يطلبنا سهر
رد مع اقتباس
المشاركة الأصلية كتبت بواسطة KASSAR
