شيعي وحسيني وخادم المذبوح سموني
من طينتي امبين علي عاشگُ ومن لوني
ربتني أمي بالحسين وضوّت عيوني
لا عذب الله اْمي ولا منها يحرموني
والله أحبه وناس ابهلكلمه لاموني
مجنون والله إي نعم ،، بحسين اجنوني
إي أحبه ،، ومايهمني لايِم
وآنا اسمي ،، باعتزازي خادم
خادم حُسيني وأفتخر
بحسين اجنوني
شامخ وابد ما أنكسر
بحسين اجنوني
***
***
تلگاني في كل موكب ألطم شايل أحزاني
ناسي هلي والاحباب كلها وناسي خلاني
وبالماتم ومن ناعي ينعى اهناك تلگاني
أبچي وبس احسين عايش ذكره بلساني
احسين دربي وغايتي واحسين وجداني
بالأحرى الحسين ابفخر (إنسان سواني)
هو رفعني ،،، وآنا ما أغيره
ومن دمائه ،، سوّه ليه ثوره
أنادي عاشگ يا خلگ
بحسين اجنوني
وگلبي ابمحبته ظل يدگ
بحسين اجنوني
***
***
حبّه ديانه داخلي امنِ اسنين حابسها
بثياب سوده امنِ الحزن لحسين لابسها
مسلم عرفت اركاني أولها لخامسها
بس عندي عشگ احسين في هالدنيا سادسها
محبّه لا والله ماكو الي ينافسها
كربله روحي وبالحرب عرفوني عابسها
مثلي عابس ،، وآنا والله مثله
وگت الجنون ،، يبقى راقي عقله
باقي على عهد الهوى
بحسين اجنوني
العيشه والموته سوى
بحسين اجنوني
***
***
هذا الذي من دمه ظلّت تبچي كل صخره
ولون السما ابوگت الغروب الهلوگت حمره
زواره لا مليون لـ اثنينه ولا عشره
أمة محمد بربعينه تزحف الـگبره
منهو يعالم هذا هالكلّ الملا اتذكره
وتمشي مع المشايه لجله فاطمة الزهره
جاذبية ،، ابقبره شي خيالي
أسأل اشلون ،، وضايع ابسؤالي
والله لآخر هالعمُر
بحسين اجنوني
خل يكتبون اعلى الگبُر
بحسين اجنوني
رد مع اقتباس
المشاركة الأصلية كتبت بواسطة مرتضى علي
