كتبت هذه القصيدة "إلى شهيد" دليلنا على صدق القول، فهذه القصيدة كتبها عن الشهيد محمد الخضري الذي اغتيل على أيدي جلاوزة البعث الفاشي يوم 22/3/1970 ووجدت جثته بالقرب من مدينة "بلد" وقد اخترقتها أكثر من أربعين اطلاقة، أما القصيدة " الى شهيد "فقد نشرتها مجلة "الثقافة الجديدة" في العدد (14)، ويقول فيها:
(إليك يامن سافرتَ بلا شكوى..
لقد كنتَ بيننا..
وستبقى حتى نمدّ لك أشرعة النصر..
لتحيا من جديد)
بچينه وما بچينه عليك
يا چلمة بحلگ تاريخ
دكت فوگ وجنات الزمان بدور
بچينه بدم... سرج مهره..
گبل ما ياخذ بثاره ويبشر أور
بچينه شنعتذر لو عاتبت بابل..
بچينه شنعتذر لو عاتبت آشور
بچينه...
وما بچينه عليك...
ندريبك عدل ويموت..
بيك الموت.. وأنته الموت
فنه الموت يمحمد عليك أيفوت
يلخطيت بجروحك درب ثوار
يلشكيت من هام السمه للگاع سجة نار
يمحمد...
حمامات السجن يتنشدن ظلن
يمحمد.. گطايات الشلب حنن
دگلي شنعتذر للماي واطراف..
السعف والهور لو عتبن
يمحمد بيارغنه وضحايانه..
تمد فوگ الحياة جسور
موش احنه شمس
وافكارنه بدرب الكواين والزمان اتنور
موش احنه حلم ريان
ويرفرف على جفون الصبح رايه
موش احنه نبع..
يطلك على دموع الحزن مايه
موش احنه شتلنه ارواحنه ابهذا الدرب ثايه
ما نبچي على ذاك الفاج ماي الموت
واتعنه الوفه وما ذلن ايامه
ما نبچي على ذاك الفارس الما عثرن اجدامه
ما نبچيك.. هنيالك والف هنيال..
كلمن شال زاد العمر بچفوفه
ما نبچيك هنيالك والف هنيال...كل خيّال..
ما هد الرسن مره وطفح خوفه
ما نبچيك.. لو ندري البواچي تفيد
ما خلينه من ماي الدمع گطره
ما نبچيك.. لو دمع البواچي يفيد
جا فاض الفرات و(حسن) ردّ عمره
وجا ظلت ازغار كبار..
بلچن يرجع حسين وجمال وعادل وجبار
وجا دجله بكت تنحب...
ثلث توكات... يوم بيوم
بلچن يرد من تنحب عمر (ستار )
ندريبك خذت صوغه ورحت طارش
تودي اخبارنه الحازم
تودي اخبارنه الصارم
ولكلمن شتل گلبه وطرش گبلك
تودي اخبارنه الكلمن
بهذا الدرب حط رجله
يا نفحة ورد نيسان..
يا شيلة الراس وهيبة الديوان
فهد يتنطرك يمحمد ويتنطر أخبارك
دگله احنه
هذوله احنه
بعدنه احنه
ترف راياتنه ونمشي بضوه افكارك
يمحمد دگله أحنه
هذوله أحنه
زلم خشنين تدرينه
نرش أجروحنه بماي وملح
ما يوم ذلينه
نفك ليل الحزن بالدم..ولا نهتم..
يشامت روح دوّر
كل تواريخ النضال وشوف أسامينه
يشامت فوگ هامات النجم والغيم تلگينه
يشامت روح وانشد ثورة أكتوبر
وانشد كل كتر بالصين
وانشد صوفيا وبرلين
وانشد سچة الغابات
تلگه بكل شبر منها يشع فوگ العشب دمنه
حبــــــال الصلب تتباهه گَلايد فوگ ركبتنه
يشامت روح وانشــد عالجسر تذكار وثبتنه
هذوله أحنه
بعدنه أحنه
خضيري الهور يتغنه بسوالفنه
ومدّ الماي بينه يفيض لو رفت شفايفنه
وحگ بيرغ حزبنه... وهامة الطيبين..
تشهد بينه مــــــن ذاك الوكت لليوم دنيتنه
أبد ما ردت اجدام العزم بينه
ولا خفتت مواگدنه
وهاي الشمس تضوي بنور چلمتنه
بگول وفعل ذوله أحنه...
تشبه صفة الفالات صفتنه
يمحمد شوصفك والوصف يگصر
ومهر الصوت يمحمد...
على أشفاف الدهر يعثر
يمحمد شوصف بيك
وانته على الوصف تكبر
يلعمرك نبع تاريخ
ولد الولد لو مرت يفيض الزود بيك أكثر
يلمديت روحك للفجر معبر
يمحمد بجينه وما بجينه عليك
يا شمعة عرس يلدمك زواگه
يمحمد بجينه بجفن الموادع
وكل أحنه على هذه الدرب نتلاگه
يمحمد يريت أردود
لينه تعود
وأشمّن كل كتر.. بيه نامن جروحك وأشمنك
وأشهك حيل... حيل الحيل
ريت أنه والف يا ريت
عيني توجد أجدامك وأتبعنك..
رد مع اقتباس