هنا

[بحار تائه]

السلام عليكم درر

طبعا الموضوع رح اكتبه بالعاميه لهذا اعذروني عن اي مصطلح غير واضح او مفهوم مقدما

بيوم من الايام كبل لا ادخل جامعه جنت انسان كله طموح احب الحياه احب التحديات اللي تواجهني مهما كانت صعوبتهه بمعنى ثاني جنت حاس روحي (عايش)
ابتديت حياتي بالجامعه حالي حال اي شاب كلي طموح وبالي مملي اهداف اريد احققهه هذا الحجي جان باول سنه بمرور السنوات سنه وره سنه هواي كسرات انكسرتهه بيهن بس بطبيعتي ما جنت اردهه او اوكف الشخص عد حده لكن فقط اتجاهله على امل ان يتغير شي بالمقابل وجنت غلطان كلش هنا عموما طولت بالحجي يمكن .. هسه وره ما خلصت الجامعه تلاشي الطموح والاحلام اللي جنت بانيهه كلهه تفلشت .. فشلت اجتماعيا وما حققت شي من طموحي دراسيا وحاليا وهو اللي اريد اوصله من كل الحجي الفوك
الدنيا صارت عباره عن مكان اظلم ما اشوف بي نور ابد ... صرت عباره عن كتلة تشائم تعيش منتظره اليوم اللي تغادر بي لا اكثر .... حاولت هواي اغير من هالشغله بس كل محاولاتي فشلت .. احب اعرف اقتراحاتكم وارائكم للتخلص من هالشي ... واسف عالاطاله ...

[جمال الرحال]

بأختصار؟؟
كون قوي ولا تيأس ابدا ، والاصرار والتحدي اتخذ منهم عنوان
تحياتي مع تمنياتي لك توفيق دائم

[محمد صبيح]

الانسان الذي لايمرّ بحياته الفشل ، إنسان معتوه ، رتيب ، ممل جداً وبلا قيمة !
هكذا هو الحال صديقي .. فقط إياك أن يقتلك الهاجس الموبوء ، وعش بصلابة

حبي وتمنياتي لك بالخير

[أشجان الروح]

وعليكم السلام ورحمة الله
كل شخص معرض للانكسارات وضياع احلام
ماكو حياة تسير تمام
وعادي جدا ماتتحقق احلامنا
لكن هذه مو نهاية وممكن تنولد احلام جديده
دامك لازلت على قيد الحياة وبصحة جيدة اذن استمر وابني حياتك من جديد والفرص مامنعدمه توكل على الله والله يوفقك اخي

[فواطم الصافي]

ربااااااااه ممكن يكون مصيري هيج
وعليكم السلام
ما أدري أذا كلامي بي فايده بس كل الي حجيته كأن جاي تحجي عن فواطم يعني عن نفسي .. ممكن يصير ويايه نفس الشي .. ما أدري
شوف خويه تذكرت كلام أستاذه بعلم الأجتماع مره تناقشت وياهه كلتلي هاي الطاقه الي أنتي هسه شايلتهه بس تبتسمين و تعاملين الناس بلطف و متكولين لأحد لا و تتحملين زايد عن طاقتج وتسامحين وتعتذرين حته من الناس هم الي يكونون على خطأ راح يجي يوم ميبقالج من هاي الطاقه أي شي راح تتعبين
آني بأعتقادي صح ممكن تخلص كل هاي الطاقه .. أصلاً هو صارلي تلث أسابيع أحس نفسي تغيرت .. حته كل الي حواليه
المهم .. يكدر الأنسان يشحن طاقته من جديد مثل ما آني جاي أحاول هسه بس لكيت الأمر أصعب بدره وحده من ما تخيلته
كل الي راح أحجي عن تجرب و أستناد لقواعد علميه
الأنسان يشحن طاقته من جديد من خلال عدة أمور
مثلاً أن يتوجهه للأماكن الي تشع طاقات إيجابيه مثل المراقد و المزارات والمساجد
و أن يحاول بأستمرار يفكر بالله و أن يحجيله كل شي و كأن هو واحد من أصدقائه .. بس شغله من يوصل الأنسان لمرحله يحس بيهه أن الله هو أقرب أصدقائه هنا راح يحس براحه و أستقرار مينوصف
كل هذني آني أحجيهن عن نفسي و الأهم من كل شي أن الأنسان من يتعب خلي يعوف نفسه براحته شتريد خلي يسوي بس أكيد بضوابط
مثلاً هسه آني يوم الجمعه الصبح فكرت اخذ سويج السياره مالت أبويه و أسوقهه ساعه أربعه ونص الصبح يعني ماكو أحد .. بس أنفصخت رجلي اليسره و البارحه أنفصخن ثنين من أصابع أيدي اليسره .. من هيج صار ضجت بس فكرت بالجانب الأيجابي .. شنو ممكن يصير أذا سمعوني و آني أفتح الباب .. شنو ردة فعل أبويه أذا طلع حته يتوضه وما لكه السياره .. للعلم جنت مخطه أسوق السياره أستداره وحده و أرجع يعن مو هواي
عنك .. جرب تروح مطعم
أحجي وي نفسك بالمرايه .. وهاي السالفه سويهه بلا ما أحد يشوفك خاف يكولون الولد صار بي شي .. بدل ملابسك و عدل شعرك و أوكف كدام المرايه و أمدح نفسك مدح مبالغ بي و خليك مبتسم بعدين صفكـ لنفسك وكول فدوه أروحلك يا عظيم .. شنو أنته .. انته مخلوق فريد من خلق الله .. كل الدنيه تروح فدوه أليه بس كون ما أضوج
خلي حياتك أكثر أنتظام مثلاً ألتزم أن تنظف أسنانك ( أنصحك بفرجة أسنان كولكَيت 360 وو معجون كولكَيت أوبتك وايت ) يوميه الصبح وتلعب رياضه هاي اهم شي أسوي بيومي
أشتري حبوب فيتامين سي بأستشاره طبيه لتحديد نوع الشركه و كل يوم جرب تاخذ حبايه
شوف صح العراق الحراره وصلت للخمسين بس حاول تطلع الصبح جوه الشمس لو بس دقيقه مو أله ضبط جوه الشمس بس شويه تعرض للشمس و أرجع علمود تنضبط ساعتك البايولوجيه
جرب تروح لنادي رياضي و أذا جنت من بغداد أنصحك بالمدرب آصف محمد لأن مختص بأكثر من خمس فنون وحد عن كونه أنسان إيجابي و روحه مرحه و متواضع و ناجح .. و هو بعده طالب بكلية الهندسه
يجوز تضحك على هذا الأقتراح بس جرب تشوف حلقات ماشا والدب .. أدري راح تضحك لو تبتسم بس والله حلوه و أنطي روحك مجال حاول تضحك على أي شي حته لو تافه ما دامك وي نفسك
شوف كل حلقات دكتور سيف جنان .. مو طويله 3 لو 4 دقايق و تحجي عن مواضيع متفرقه بس بسجع و بأسلوب طبي كوميدي آني عن نفسي حافضه كل حلقات دكتور سيف
آخر نصيحه وهاي اتعمد أحطهه بالأخير لأن الناس ميهتمولهه .. بسبب الفشل بشكل لا إرادي أنته راح تعوف الصلاة
شوف خويه أكثر حاله يكون الأنسان يفيض بيهه بالطاقات الإيجابيه هي من يصلي .. يعني هو لو ما متشبع بالطاقه جان ما فاض بيهه .. صح
هسه جرب من باجر .. أول شي تأكد من وضوئك إذا جان صحيح لأن أغلب الناس وضوئهم خطأ بعدين تأكد من صحة صلاتك ..
أذا بنفس اليوم شفت عندك استعداد حاول تكوم تصلي و أذا لا جرب ثاني يوم فكر بينك ما بين نفسك بالصلاة وشون راح يفرح الله من يشوفك تصلي .. وشنوو الفرق أذا ضليت كاعد عشرين ساعه ماكو فرق فـ كوم صلي
بما انك تحب التحديات حاول تتحده نفسك وكول آني اليوم اريد أصلي فرض واحد .. هاي أذا من الأساس جنت متصلي .. يعني أبدي شويه شويه
راح تلكه نفسك عالقليل أنسان متفائل
هاي الحلقه صح ما متجسد بيهه أسلوب دكتور سيف بشكل كامل بس النصائح البيهه أذا تطبقهن راح تس بنفس اللحظه يعني بالمكان راح تحس بتغيير وطاقه تدفعك
شوفهه



آسفه هواي كتبت وجنت أريد أكتب أكثر بس بابا كعد و آني ماخذه الحاسبه بطرق غير شرعيه .. يعني أنبسط أذا شافني فاتحته
في أمان الله
بس لتفقد الأمل وحاول تحجي لله أي شي أي شي
مهما يكون تافه أي شي لأن لله قلب واسع يتحمل الكل و يضمهم بين أدين رحمته بس لازم هُم يتوجهوله
أتمنالك كل التوفيق
في أمان الله

[Aabdullah]

كل انسان ممكن ان يشعر بالاحباط وخيبة امل
بسبب مقارنة نفسه بغيره او لعدم قناعته بالاهداف التي تم تحقيقها
او دخول شخص غير مناسب الى حياته فاربكها .. او خروج شخص عزيز منها .. والاسباب كثيرة
بالنتيجة كل انسان ممكن ان يمر بهذا الشعور
في هذه الحالة نحتاج ان نتابع بعض البرامج المحفزة لان الانسان بين فترة واخرى يحتاج اعادة شحن معنوي...
توقع حلول آنية سريعة لبعض مشاكل حياتنا احد مصادر الشعور بالاحباط
لا تقارن نفسك باخرين وسلط الضوء على انجازاتك ونجاحاتك وتأكد ان القادم افضل فالحياة لمن طلبها وليكن مستوى طموحك اكبر من الواقع بكثير فهناك مقولة مفادها (اطلب الكثير تحصل على القليل) .. وتأكد ان الاهداف العظيمة في حياتنا تحتاج الى صبر ومواضبة في السعي على تحقيقها ..
القرب من الله والتوكل عليه يعطينا شعور بالامان والثقة بالنفس
وان شاء الله .. ان مع العسر يسرا ....
فقط .. لا تفقد الامل

[سومر]

قلل إحساسك وشعورك بهذا المعنى ولا ترضخ له وحاول تشغل نفسك أكثر صديقي

[عضوية57049]

مشكلتك مو سهلة صديقي ، و اني نفسي داحس بالتعب بس افكر شلون ترجع طموح و تستعيد حيويتك و تباشر تسوي شي لنفسك فعلاً


اسلوبك لطيف حيل ، و كلامك يوحي انك ضعيف او خجول .. و للاسف م كتبت اكثر يا ريت حجيت تفاصيل اكثر مثلاً صار كم سنة و انت هيج

عموماً مبين اكثر من سنة ، و اذا اكثر من سنة معناتة انت مريض بالاكتئاب ، مو ( تحس ) بالاكتئاب ، ولو ماحب احجي بشي ماعرفه

عوفك من الكلام الي يكولوا لك ياه ( لتفقد الامل ) ( خلك قوي ) ( صير طموح ) ولاب لاب لاب لان هذا بس كلام فارغ ميودي ولا يجيب
و انت من طول وصلت هالمرحلة معناتة متكدر تعتمد على نفسك و يراد لك ( إرادة ) ثانية او وسيلة خارجية حتى تساعدك و توجهك ،

اني اكول تروح لمعالج او طبيب نفسي و هو يخلي لك خطة و ينظم لك حياتك او شي ، هالحل اشوفه افضل شي لان محتاج شخص يكون مسؤول عنك و يوجهك و الافضل حيكون طبيب لان يفتهم ،مو تعتمد على صديق او اخ و هم كلشي م يعرفون

عموماً بدل مترفض الفكرة اول متقراها ، فكر بيها شوية

و مراح تخسر شي غير فلوسك

و مو اسفة على الاطالة ، و جديات اسأل مختص حتى اذا صدك بيك اكتئاب او لا ، و لتستهين بيه لأنه مثل السرطان سيقضي على حياتك اكثر و اكثر

[specialtoma]

رئيي مثل رئي غاغا

[كرار الحسيني]

أخي العزيز الشخص هو من يبني شخصيتة بأيده ويذمها ويهدمها بأيده طبعاً انتة رغم ماتكلمت عن حياتك والي وصفتها " بكتلة شتائم " انتة الأن قادر على ان تكون في رأس الهرم او الجبل بأعمالك أبني لنفسك عمل تجعل الكل يتمنى انو يتكلم معك ارجع هذاك الطموح قبل دخول الجامعة ارجع لماضيك الي كنت بية ثاق من نفسك وابدي مستقبلك على أساسك الاول وانسى مرحلة الجامعة والفترة الي تشوفها مظلمة بحياتك خلي عندك هدف واسعي وتغلب على خوفك تنجح وراح تكون انتة سيد من شتمك ويتوسل الك ابدي مشروع شهرة انتة تگدر والحاجة لبناء الكيان الشخصي بوسط مجتمع صعب يطلب خطوتين منك انهض من وجعك وتأمل صباح مشرق ولاتلومك لومه لائم ولا حقد حاقد وحط عينك بعين الله واسعي وهو يعينك .