.
متت وياي من اول
وتريد تعيش من تالي
كتلتك..؟؟
جاصرت مثلي ؟
وتريد اتصير جتالي
احسك ظل يرافكني
ويكبر من تجي الظلمه
يصير اخيول وحشيه
وتطاردني
اروح الوين ؟؟
رحت الكل مكان وسيفك اكبالي
اروح الوين ؟؟
الا اشلع كلبي بشرايينه
واجمع نار واحرك كلشي
من بالي
احسك ظل يرافكني
يضحكني
ويبجيني
يسكتني
ويحجيني
اروح الوين ؟؟
شكثر من بحر ؟؟
ذبيت بي روحي
ولكيتك عالجرف تابوت تبرالي
احسك مدري شنهي انته ؟
بحر يتبده بجفوفي
واريد اشرب ولاكطره
وشوف الروح مثل الروج
تتكسر على الصخره
ونا وطرواك..
طاحونة هوى يفرنه
الهوى العالي
ياشارع يلمي بليل... ماكو
بيت من اسوالفك خالي
اروح الوين ؟
شكثر من بحر ؟؟
ذبيت بي روحي
ولكيتك عالجرف تابوت تبرالي
وعليه تصيح
ضنيت العشك وركه رساله
وتاهت ويا الريح !!
ونا الخنجر دفنته وغلفة الزنجار
ضنيت العشك وركه رساله
وتاهت ويا الريح !!
نمت
ومادريت الريح
تاخذها رساله الكبرك السهران
وادليك بالعنوان
وتردك علي ردود غيم وريح
ياشارع يلمني بليل
كل كطره مطر ..صخره
على راسي اطيح !!!
احسك ساجيه بلا ماي تتبعني
امشي ..
وهي تتبعني
التف بالدرب وتالتف على ايدي
تصير حيه وحيل تلسعني
خذت سمها بوريدي
ولذت بالبستان
صرت ويه الشجر شجره
نص جسمي اندفن بالكاع
والباقي امن اديه اغصان !!!
وسموني بوكتها
شجرة النسيان
ويمر الوكت بسكوت
واكعد من منامي
ولني مامكتول !
اثاريني جنت حلمان
حلمان ........
رد مع اقتباس
