كلمات قصيدة رديت دافن سما
..
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
راجع بكلبك اثر وقع المصيبه * عل الكبر من تبعد دموعك قريبه * ياعلي النسمه التجي بصدرك غريبه *
هذا حال اليرجع ودافن حبيبه
دمع البجيته شكثر ؟ * لمن حفرت الكبر
ياعلي رايد جواب * هم بجه وياك التراب؟
كد ما بجالك ضمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
فاطمه بكلبك جرح تركت وراها * عطر حزنك ياعلي ظل بثراها * يعينك الله تحملت لوعة جفاها * النجمه صعبة تقبل تفارك سماها *
بس كلمه منك ردت * من وادعتها شكلت؟
الحزن ذاكه عجيب * حتى بالجنه نحيب
يعقوب هم رد عمه *
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
من كبرها وصتك هاي الوصيه * من جنت ويالحزن كاعد سويه * ارجع لدارك كرب وكت المسيه * خاف زينب لو صحت تسأل عليه
خفت الجرح لا يفز * خليت كلبك حرز
من ردت تلقي السلام * عانتك كلي الجدام !
من جدمك اتقدمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
من دخلت لدارك ابوحشة ظلامه * بين وحشة فاطمه وبين اليتامه * منو كلك الحمد لله عل سلامة! * ابغار حزنك ما بنت عش الحمامه *
ليلك سقه اشجم جرح * وشلون طر الصبح
كولشي بحساسك حزين * حتى ضلك بي انين
نبصك اسم فاطمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
اشصبرت زينب لمن هلت دمعها * طفلة جانت والقدر بالام فجعها * رادت تسألك تره ودمعك منعها * امي بويه اشسوت وكسروا ضلعها !
تدري العذر مو سهل * لو راد امه الطفل
ياهو اليصبر عليه * ويمسح ادموعه ابديه
جف القدر يتمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
وسط دارك ظلت آثار المنايه * هناكه سجادة نبي وهناكه اية * تشوف دمعة فاطمه بكل الزوايه *
من الباب المحترك ظلت بقايه
وهنا المحسن وكع * وهنا الباب اندفع
بعينك اجوبة السؤال * امبينه اثار اغتيال
خطة جرح محكمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
من محمد بلغك امره وقراره * الامة راح تغدرك بنص العبارة * كالوا مجتف علي بعهده ووقاره * وانته اليخاف القدر من ذو الفقاره
والله لولا العهد * مايبقه منهم احد
حال عن ثار البتول * مستحاك من الرسول
ماراد تسفك دمه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
ظنوا ابمقتلكم اتموت السياده * مادورا مستشهدين من الولاده * الي أثر بالمحب وادمه فؤاده * الدفع بابك علي فعلاً تماده
باب الي يستر هلك * مو خشب اصلاً ملك
كلفه الرب الكريم * يحرس الستر العظيم
فكد الطفل المه
رديت دافن سمه
بيتك ابلا فاطمه
ونتك موت وحياة
دمعك ويالذكريات
رديت دافن سمه * رديت دافن سمه
اداء الحاج :باسم الكربلائي
كلمات الشاعر : إيهاب المالكي
تدوين : Zahraa Al obaidi
18 جمادى الاولى 1439
رد مع اقتباس
المشاركة الأصلية كتبت بواسطة مزاجية وكذا
