احس روحي رماد وجاني ضيف الريح
وكرمته ابلا حدود اتطشرت كلي
چا لمن تجيني انته وتدگ الباب
شنطي الشوفتك لمن تمر گلي
ما ارضه اعله روحي لو صدگ مريت
إذا مو ألف ركعة اگبالك أتصلي
وما انه بعيد عنك
ضوه بطبعي وياك
بس فتح اعيونك گبل توصلي
وانته الردت والما ردت مرخوص
غير الحطب فوگي اشرايد اتخلي !
تعوذ ..
بعد رمشه ويعله صوت الريح
وانه ريشه من اطير شلون توصلي
وبطل من ملحتك ثگلّ وزن الغيم
بعد هبت شمال وينهتك حملي
وشـحني من النخل
طيرة وجذرها ابطين
بس كسر جنحها ايجرحك اسلي
شـأگلك لا تمر خافن صدگ تنغاظ
عبالك صدگ وتگول هلـ گلـي
وآنه الشوفتك اربط الشوگ ابريح
يوصلك لچن ما گلت يوصلي
الدله اشما تعب بيها اليسوي ادلال
يظل مر التصبه وأبد ميحلي
واعرف مقصدك من صرت بيدك سيف
تطعن بأي ظهر كل مقصدك ذلي
اتگصني
اليا ذنب !
من ثمري تملي اسلال
وعيوني الشمس تعميهن ابظلي
من صار الدمع .. اول خصم للعين
درع غيظي اعله عينك واجب اتخلي
وخليتك درع وشمة اعله صدر العين
تصد بس الفرح والباقي يوصلي
الطير الينجرح يستر اجروحه الـريش
وأنـه اجروحي عليهن ريش اليدلي
" شوكـ .. اويه الورد "
تزرعني گلي اشلون !
انه ويا سوه
بيا بخت يوصلي .. !
___________
لـ ميثم فالح
2018
رد مع اقتباس
المشاركة الأصلية كتبت بواسطة علي *الاسدي *
