ياعلي السامري ** طفه ضيّ ناظري
عصرني سطرني ** وأنكسر خاطري
جيت الناوي الغدر متعني داري
وهوَ يدري ابعفتي وستري او وقاري
من دفع بابي اونهرته ودمعي جاري
اتحجبت من خوفي بيميني ويساري
ماخجل من صحت ** صوبتني وطحت
شتمني وهضمني ** والصبر ناصري
__________________________
وآنه بيك أستنجدت ياحامي جارك
طايحه ابشدة ونخيتك بإنتظارك
حگه لو يزعل على يمينك فقارك
يلي حيرت الصبر من أصطبارك
من أثر شدتي ** وجهت شكوتي
عتابي وعذابي ** وصبري ومكابري
__________________________
من شفت ياحيدر النار السريه
صارت اگبالي الخيم والغاضريه
گمت أصيحن وين بنتي الهاشميه
وين ليله ورمله وسكينه ورقيه
نار ماتنطفي ** ابداري ما تكتفي
حطبها ولهبها ** بايع ومشتري
__________________________
صبرك إعليه أشد من الجرالي
آنه غيرك ياعلي ما عندي والي
والحسن وحسين أولادي الغوالي
گابلوني ابحسرة يبچون اعله حالي
مايداوي الدمع ** لوعة من الضلع
ولاني من اجاني ** ظالمي وغادري
__________________________
روحتك للمسجد الزادت ونيني
خلفك أسعي ابلوعتي وهايج حنيني
ماچنت أدري ابغفل حاقد يجيني
ياعلي ابچفه سطرني وطفه عيني
تدري ياحيدره ** دمعي من دم جره
هضيمه وظليمه ** ألمت ضامري
__________________________
فاطمه ابدرب الولايه اول شهيده
ليش صاحت ينهضم حق الصميده
هذا نَفس المصطفى وأصل العقيده
وآني أبني المهدي ياخذ ثاري بيده
من بعد غيبته ** يظهر ابرايته
اعتقادي مرادي ** وارث العسكري
__________________________
لومتت رب العرش يخلقلي شيعه
كل صباح اتصيح ياثار الوديعه
وثار ابنها السلبوا اثيابه ورضيعه
وثار زينب ثار الچفوف الگطيعه
كل وگت شيعتي ** تبچي لمصيبتي
أجرها ابحشرها ** ينصب منبري
__________________________
كلمات الشاعر ~ السيد سعيد الصافي الرميثي
__________________________
Mp3
رد مع اقتباس
المشاركة الأصلية كتبت بواسطة هيفين ღ
