هنا

[روح]

حبيت أسرد شوية عن نفسي لان اغلب الاعضاء ميعرفون منو روح ..

قبل مااحجي اعتذر لبنات حواء على الاعتراف بالعداء لهن ...بس الصراحة تجري بدمي
..

اني شخص روتيني الى درجة الاعجاز ..يومي يتكرر كل يوم ..لهذا سنة وحدة ماسوت اختلاف كبير عندي ..اقصد بين رمضان العام ورمضان السنة ..

بس ممكن الاحداث الجديدة الي صارت وياية هي عبارة عن اشخاص جدد دخلوا لحياتي ..منهم الي لعب بيها وخرب الاول والتالي ..ومنهم الي جملوها بشكل ملحوظ ...تاكَ لاشجان الروح
..

اكمل ..

[روح]

مميزة روح ... احلى شيء بيك انك تعرفين دواهي حواء

طبعا مو كلهن لكن الاعم الاغلب
..
خليني اوضح سبب العداء لحواء ..
بكل حياتي كل المشاكل الي واجهتني كان السبب من النساء ..احداث كبيرة واجهتني واكبر من عمري واكبر بهواية من طاقتي وتحملي ..وكان السبب هي وبكل مشكلة تطلعلي حواء صفح
..
الوالدة دائما توصيني من الرجال ودواهيهم ...والله يحفظها نست توصيني ان ادير بالي من جنسنا اللطيف


ربي يسعدك أخ ضياء

[الجنوبي ابن الناصريه]

بالتوفيق..متابع

[روح]

بالتوفيق..متابع

تسلم حيدر

[روح]

النت ضعيف جدا ..والكهرباء ماقصرت همين ..

وبما ان احنه بالعراق العظيم ف اكيد ح تنطوني العذر ..

اكمل باجر

[إدريس]

النت ضعيف جدا ..والكهرباء ماقصرت همين ..

وبما ان احنه بالعراق العظيم ف اكيد ح تنطوني العذر ..

اكمل باجر

بالأنتظار

[روح]

..

بما اني متخرجة وبالعراق ف أكيد خلصت الفترة من تخرجي للان ابحث ع شغل او وظيفة وبأي مجال ومكان ماجان عندي فرق ابدا ..ماجان همي ان احصل فلوس بكد ماجان همي وتفكيري اعتمد على نفسي واحس بقيمتي ..لذلك قبل اشهر من اليوم ..تحديدا بشهر 10 تعينت بشركة أهلية تقريبا معروفة بالمحافظة ...ومديرها هواية ناس تعرفه على انه "سايكو " على كولة سامح
اشتغلت بصفتي محاسبة للشركة ..بعد التدريب وطبعا عشرات البنات الي قدمت وياية بنفس الوقت ..لكن تم اختياري ..ومااعرف اذا كانت هذه ضربة حظ او سوء حظ !
طبعا كانت اول تجربة الي بالشغل ..ومن هذا عرفت ان الناس الي تملك فلوس هم اظلم الناس ... كان يعامل الموظفين على ان هم عبيد عندة ولاهله ..ومامن حق اي احد يبدي اعتراضه على اي شي ..الخطأ صح الى ان هو المدير يثبت العكس .
كنت دائما اعارضه واناقشه لان الاخطاء الي يسويها كارثية بحق البشرية مااقبل يعلي صوته ولا يأمرني بأي شي خارج حدود الشغل الي تخصصت بي ..برغم من قلة خبرتي وضعف تدريبي الا اني والله نقذته من هواية اخطأء وهواية ديون ..وصلحت بعض من علاقاته الي هدمها للارض من ورة عقله القافل وغروره .
..
وبما ان هو عنده فلوس ومدير وقافل وسايكو ..ف كنت اني الموظفة السيئة بنظره ..لاني دائما أكله " لا " .
..


اكمل

[روح]

كان دوامي يبدأ الساعة 10 الصبح من كل يوم ..

فد يوم من الايام رن التلفون الساعة بالضبط 5 ونص الصبح ..
المدير هو من يتصل ..رفعته ..كلمتني زوجته . ."عيني ست فرقد المبالغ ناقصة مليون ونص من بريد البارحة ..ف ياريت تكليلي وين راح هالمبلغ لان مثل متعرفين مثل هيج رقم مينسكت عنه " !!
..
ردة فعلي الوحيدة تجاه هالكلام الي سمعته هي اني ضحكت بعلو صوتي برغم ما كنت كلش نعسانه بوقتها ..
كلتلها يمعودة كولي غيرها مليون ونص رايحات بشرفج لو احجي هالنكته لطفل او مجنون جان ضحك عليكم مو عليها .!
..
تحجي ويايه بعصبيه ومحترك كلبها ... تكلي محتاجين المبلغ ياريت تكولين وين ..
طبعا اني شكيت بالموضوع ان هالشي لعبه ..لان بوقتها بالضبط كان الوارد كله مالت الشركة اقل من مليون ..والمدير على علم بهالشي ..
..
المهم كان جوابي ببرود اعصاب تماما ..ان هالوقت مو وقت دوامي ومستحيل أرد او اتكلم بأي شي يخص الشغل ..من أداوم عود نتناقش بهالموضوع ويصير خير ..

صار وقت الدوام ورحت لكيتهم موجودين المدير وزوجته ...وولا واحد منهم اتكلم بالموضوع ..
فتحت الموضوع اني ع اساس نتناقش بي واوضح كل شي ..استغربت من أن هم ميردون يتكلمون بأي شي .." فرقد خلص سدي الموضوع وانتهى " !!
..
عاد اني عرفت شسالفه
كان وجودي مو مرحب بي عند المدير لسبب" أن اني مااسمع الكلام ..والرفض ع اي شي واي امر عندي اسهل من شربة الميّ" ..طبعا هالكلام صحيح لان اشتغلت بصفتي محاسبة مو غير تخصص ولا عاملة خدمة !!

..


هم اكمل

[روح]

..

بهالايام الي اني دااداوم بيهن برغم القرف الي اشوفه بالدوام ..الا انه صار فد حدث معين ..جميل الى درجة أني لحد هذه اللحظة مااعرفه حقيقة او حلم ..
..
اشتدت الخلافات بيني اني والمدير بخصوص الشغل طبعا ..حاولت ابطل اكثر من مرة لكن كان يرفض ويرجع يطلب مني بهدوء ولطافة حتى اعذره لان هو مضغوط من الشغل ..ارجع ابلغ اهلي بهالشي يكولون ان كل مدير شركة اهلية يكون نفس الشي وكلهم على نفس الشاكلة

وكانت نصيحتهم الي ان اني اكمل ..وانسى كل شي ..

بالفعل كملت ..مرت ايام هواية ..

بيوم رن التلفون الساعة ب 6 الصبح !
"المبلغ ناقص 500 الف " ..وطبعا كان ردي نفس القبلة ..وصار تماما نفس ما صار وية المليون ونص القبلهن ..
..
حبوا يستغلوني ع اساس اني صغيرة وجديدة ع سالفة الشغل وهم الله يسلمهم اذكياء الى درجة ويكدرون يضحكون عليه ويخلوني اخسر المبلغ الي هو اساسا ما ضايع ولا ناقص .." من الموظفين الي قبلي وتركو الشغل عرفت ان هالرجال يسوي وية كل محاسب مثل هالشي ويخليهم يخسرون على شي هم اساسا مخطأنين بي .. وعرفت ان الدور اجه عليه ." بس على منو "

جان مخلي كاميرات مراقبة بكل مكان يشوف ويسمع كل شي ..بس الشي الي ما شافه ولا انتبهله ان اني كل مبلغ اصورة واكتبه بمسودة ..واضم نسخة من الصك عندي حتى من تصير هيج حالة اطلعه واخليه كبال وجهه ..
طبعا اجت عازت هالاشياء ..طلعتهن وتحاسبت وياه ع كل فلس ..ولا تشوفون الصدمة عباله كل انسان عداه غبي وميفهم وان الي يملك فلوس هو الوحيد الي بشر !

..
تركت الشغل ..برضا طبعا وبكل هدوء وبلا اي مشكلة ..

..

الملخص : كلت توبة اشتغل بشركة اهلية لو اعرف اموت جوع ..وعرفت ان الكرامة ما تقدر بمال الدنيا كله وكنوزها ..
..
والشي الاحلى ان اني عرفت نفسي شخص يعتمد عليه ..وقوية الى حدٍ ما .

اكمل

[روح]

ملاحظة: لحد الان المدير يتصل عليه حتى ارجع للشغل ..يكلي فرقد صدك جذب انتي رحتي منا واني انفكَرت منا
..
جاوبته ..والله لو تخلي الشمس بيميني والقمر بشمالي ماارجع اشتغل وياك لو اعرف تخسر كل شي .

واللهم لا شماته ..فعلا حال الشركة عنده صار بالحضيض من ورة الغرور الي شايلة والتفكير المو عقلاني ابدا ...
..

تعبت

ارجع اكمل بعدين