يا ربيع أنحيل سنبل ديرتك / عريان السيد خلف
وشويه من دهلتك
شويه بلجت هالسنابل
لو رواها الزود تحله
بلكي حفنة ريع من بعد الكَحط
وتسد على الظيوم خله
وشالت ابهمها الليالي حمولها
وحملك يظل بالكَاع فشله
وانته ابو الشيمه اليوصفنك شهم
ما دورت بالضيج ختله
يلي ما طخيت راس المحنتك
والمحنه على الغمان ذله
و خاف اشتت لو كَلت ذله
وخاف عني تكَول طياري وطفح
مل الصبر والصبر مله
ريشه بريح وانه بعين
من عاداك سله
لكن احجايه اعرضت
وتعيرت والعار دفله
وجيتك وسمت اليعرفونه الزلم
يكطع درب ويحسم اهله
انا ابن ذاك الطنى
وعار النشامى ثجيل حمله
جيتك وترس الجفوف دموع
ما انطيك مهله
موجر بكلبي الدهر
وترادفن عله على عله
ها كضني انتول الدنيه
وبعد هينوب ما بياش نتله
وانته حتى الينكسر
وكت اوزه الصدرك تكلفه
وما ترد بغير خزله
نومس المهوال خل كَرص الشمس
يعمي اليصدله
وضمد جروحه وعلى ظهور الوذن
بالضيج شدله
وخل تأمن عين
غاطيها الحزن
واحد يرد محفوظ لهله
وما اصدك لمة الخوان عزت
وانت جفك سال ملح
وما اصدك عتبتك وي الليالي السود تنتحه وتدلها
وانت جربت الليالي علكمها وعسلها
وما اصدك ترضى بالخوان يتشتت شملها
وانت تدري بكل شليله أتيه من تفكد وعلها
وتدري بالدنيا لعب رضعان ..رمشة عين ويتبدل شكلها
وتدري تفرش باعها لجدم النذل وتلولح الزاجي بحبلها
تاهت الدنيا وغدت شاخات وتخلبط غزلها
وانت الك عين البصيره وتلمح العسه وتحلها
ما تطخ راس على الحسبات من يثكل حملها
شد على زناد الشهامه وفتر العين لكحلها
مو ذبل عود الورد والدار تستغرب نزلها
مو كظتها حجاية البطران والباطل كتلها
صيح بأذن الذيب صيحة موت يا غدار
خلها هاي ديرتنه ولا الناطور بيها وذوله اهلها
يا فشلها ..يا فشلها كون خشوم سمره تنام
والهارب يذلها ...خلها تفرح بيك يل دمك مسح دمها وغسلها
واجمع النجمات المشتت شملها ..أخ يا لمة شملها
رد مع اقتباس
