زيارة المسؤول
فزيت بابي حلو
وشارع هلي مغسول !
مريت عالارصفة
شفت الورد مشتول !
.
بساعتها مافكرت ؟
فرحان بس مذهول
واتساءلت ؟ يا ترى
فز الشعب ؟ معقول ؟
.
جاوبني شرطي الامن
(نزل كرامة هلك
ارفع اجفوفك فوگ
شايل ضمير؟ انخفض
شايل حزب؟ضل فوگ)
جاوبته شايل جرح
باقي بقميصه عطر
ريحة وطن محروك
وشايل بكلبي حزن
شايل وطن مبيوك
(تفتيش،،،،،،ضم دمعتك
ضم حزنك ولتكول
تفتيش،،،،
ضم صرختك
ضم الفقر
والقتل
تفتيش،،،،،،،،ضم الالم
وسد حلك ابو المكتول
تفتيش،،،،،،،،،،
ضم الوطن
ضم الحلم
والعشك
خاف الزيارة اتطول )
ساعتها
كتله اختصر
ادري شتريد تكول
(تفتيش
ضم النعل
باجر يجي المسؤول)
عقيل العرد
رد مع اقتباس
