مدفوع الثمن والسيف صاحب ذوق
مدفوع الثمن والسيف صاحب ذوق ..
وسوالف نيه ما گعدهه یم الباب
صم تراب للصم اذنه عن اذان ..
وچنه ایتیم صله لوحده المحراب
وي وجه الصبح لبسو وجه جناز ..
گصیبة متيهه ما عاجبهه راي حجاب
ترى الدخان شيبة ضيم بالفانوش ..
عكس الليل خلص عمره عايش شاب
حچي الگصبة سيف و واگف اعلى الماي ..
ولون انثلمت اعلى الطين توگف آب
بمگفه الماي ذب عطشان طاست شوف ..
او رد الماي بس چان العطش سلاب
ترى چویه الگمر عایش بگصة اللیل ..
وهوه اللیل لو ما الظلمة ما ینهاب
اشمن وردة من ایسولف الفلاح ..
ولون یسولف الفلاح اشم اتراب
اعلى وجه الگاع شامة ونابت العاگول ..
وچي صداگ خلص عمره ماله اصحاب
سبي الشمعة مو بحبال يكفي خيط ..
وكزبرت الجلد يكفيه صيت الناب
طبرو ماي وانترست جربهم طين ..
تنوش الگاع من ثگل الذنوب ارگاب
الفکر محبس واصابع تارسین الگاع ..
وتلگه بکل صبع گد الجفوف احزاب
مثل ما عالمتن شدوهه رتبة سوط ..
خلو رتبة البسمار دفعة باب
الیکشخ بالصبح بایگ صلاة الليل ..
اليعزب السيف شبگه بروحه تلگه اگراب
الشمس ملگوفه بیهه المغرب ایفك ريج ..
الحاقد عالضوه مقلد فتاوي اغراب
حساب السيف تلمه الروس وعلى الروس ..
بس فقار يفگس شوف وكت احساب
رفت محمكة و وگفت سراط الـ ( آآخ ) ..
وبس الدمعة تگعد وي حچي السرداب
اثر ظله اعلى وجه الخيمة زفة نار ..
ولو طفوهه تبقه الخيمة چف وانصاب
ايهاب عيال الظالمي
رد مع اقتباس
