تطبّع مو طبع

تطبّع مو طبع علمها تنسى الروح
و لا تحجي الصدگ عودها تتعود
كافي اتظل جسر خلي النهر ميزان
شوف اعلى الجرف جم صوت يتبدد
وأخذ مني الجرح أول علاج أجويه
مو آخر علاجه النار يتمرد
و أدرس نفس أهلها وعود أدگها البوب
ليش انطيها لزمة بوجهي تتسدد
يم عالم صبخ لتحط خضار اتدوخ
كل يوم اليمر بالموت تتهدد
دلو الغربيل أگلبه و ماي أنگل بي
ولا اخلي العطش بالروح يتوعد
يجي گبال الشمس فترة و يولي الغيم
تعقلها الشمس بالغيم تتلبد
أذبها اعلى الصبر كون الملاگة بعيد
جراحات البعد بالصبر تتضمد
بذلة لو كرامة الموت نفس الموت
واحد ينهمل و الثاني يتخلد