الى الأب ( أذكرك )

أذكرك وأدري ذكرك يهدم الحيل
إلمْ شوگي تذاكر وكت الغروب
وأسافر لك خيال شما يجن ليل
مثل سباحة اتيه بروج الضنون
واتمادى بحسبتي وأغرگ بالتفاصيل
وما بين هدوة بالي وغمضت العين
احس الليل ساعة تخلص بالتواسيل
ويطر فجر الله ويرجع الشوگ
يلچم جرح گلبي وبيهم يعيل
ويطگ فيض المدامع جرف العيون
ويا سدة جفن تلزم للدمع سيل
أوديلك عتاب بثگل الأشواگ
بريد الصفنة وضنوني المراسيل
وما يوصل أعتابي وأعذر الروح
جنح فراشة گلي شيگدر يشيل
عاين شوف بيه شسوه الفراگ
بصفناتي شبه شلت من التماثيل
وارد وارجى اللقاء الأبد مايصير
أمل مجنون يجمع هوه بغربيل
شبعُد بعُدك عليه بواقع الحال
رغم مرتين تربة ابينه تحيل
خذك موتك غفل مستعجل الموت
سچة ومر عليك بسرعة الريل
ما تارك عذر تارك أثر للعين
بجتافي لشبگتك وشم زنجيل
أشم بثياب شغلك وألگه للطيب
شبه يشبه فكة گشرة الهيل
يعطر طاري ذكرك جو الأفكار
أمان أسمك يهدم الخوف ويزيل
شكبر خلوة مكانك ياگمر ليش
غبت وطفت غيبتك نور القناديل
الوحشة خلاف عينك سكنت البيت
وثگيل البينه سعفة وبالهوه يميل
حكيم البيت أنته يريدك البيت
هضيمة تروح غفلة بغير تقبيل