تابوت فارغ
مثل تابوت فارغ انشمر بالكاع
ومن انترس فوك متون حطوني
يشبكوني وتطيح دموعهم فوكاي
شايل كل عزيز ومايحبوني
مصلايه انفرشت بكعده مالت كيف
خلص كيفهم وبعيد شمروني
جنطة سفر وي الشارد ومرتاح
ومن خلصت العازه تراب ترسوني
ليل وانكره وبلا ذنب لاصوج
ومهيج الالام سموني
لاخايني عاشك لامفرك اثنين
لا لاجم جرح بالغلط ذموني
انا ساتر عيوب النايم وسهران
نجم ومتعب الرادو يحسبوني
كصب من انحني بمضيف شيوخ
بس وكت العزف ياحيف جووني
ناي ومطبك وللحيه اطك بالراس
بصفار وضعف شو للظيم وصفوني
نخل كل عمري خير ورطب للجوعان
السعف نوعين ستر وحطب سووني
وفي وتاكل وبكلبي الطيور تنام
لكن من كبرت بشين جازوني
كصو راسي ردو للجذع كصوه
كصو كلبي نكرو فضلي عابوني
نخل حتى من اموت افيد الناس
جمار اكلو كنطره سووني
انذب بكفه كل عزيز يروح
انا سر الحياة الخلك سموني
تحياتي وعيدكم مبارك