حنيت الك
مثل دجله وفرات اعيوني صبن ماي
لأن حنيت الك واشلون اسكتهن
رحت مني يوالد وانه عمري ازغير
وصور عندي الك مايوم افاركهن
تعال وشوف كلبي اشلون عايش نار
وجروح الزمان اشلون اضمدهن
اذا اذكر خيالك روحي كلهه اتذوب
وملامح صورتك بعيوني اطرزهن
شسولفلك شكولن وانته ابعيد
وهموم الليالي اعناد اجاملهن
مثل طيبة حنانك ماشفت بالكون
وكلماتك ابالي ودوم اذكرهن
اذكرك بالقصيده واكتب الكلمات
حالف بالقصيده اعصاب ادمرهن
ياشمعة حياتي ابد ماانساك
رغم احزان بيه وجاي اقشمرهن
اسنين العمر يابويه معدودات
مااعرف يساعه اليوم اودعهن
بس لازم اجيلك واندفن وياك
وكبور النجف وياك اجاورهن
====================
ضياء ابو خالد ... واسط
====================