رديلي الفرح رديت

رديلي الفرح رديت
معضد باب يبچيني
وأحن حنة حمامة بيت
مثل الطاكـ محني عكاه عالمهجور
يلتم العكد بينه ويعبرني ثلاثيني
جنح عصفور ... تايه والعكود تدور .. تايه والعكود دور .
للفضوه نشرنه چفونه جناحين
صارت بلحظه طيارات وغنغنه
وجرح جنحي الطفل ياطوفه غصن التين
وجنح غنيده دك جنحي وكسر عمري
وعبرنه سواجي وبساتين .
بالحفره كبرنه سنين
وردينه لهلنه هدومنه تنكط محبه وطين .
يغنيدة امس ياحلوة الحلوات، صار العمر طوفة طين.
وغفينه ولكينه الدرب والسماك وقمر الدين .
نتختل وره النسوان والشياب
وندك المحله الحلوه باب اباب
يا أول جرس أرعن نتل فرحة وكاحتنه
كبرنه سنين
يا أول جرس إنتلني ... إنتلني
لغنيدة امس للضحكه ردلي جناحي رجعني .
وتغيب الشمس خضره على محّجر الجوارين
وألمح عمتي من بعيد وتضمني بعبايتها
وحسها البيت
عمه الشمس ماتت وانت مارديت .
عمه الشمس ماتت وانه مارديت
رديلي الفرح رديت .
معضد باب يبچيني وأحن حنة حمامة بيت .
أتلمس ثلاثيني وازتهن شدة امفاتيح
مارهمن ولامفتاح .
لا افتك العمر بيهن ولا افتكيت