وادعيني وداع المحبين ماضايج حلاته

وادعيني وداع المحبين ماضايج حلاته
وادعيني بدمعتج
خلكي عله الدموع شفضاته
انه مثل الطير
لو طاحن طوارف سبكاته
لو مثل ضامي ابظهاري الصيف
من تنشف لهاته
عايش بنارين
اهن نار الجفه ونار الشماته
وانتي تدرين الوكت يردف علي بمكسراته
حطني دوارة كطب للضيم
وافترت رحاته
لا نهار ايريحني
ولا ليلي ليل الناس اباته
وادعيني
وداع الامايه لولدها
اثنين اديهه موسراته
لا تبرد شوكهه
ولا تكدر تهده لغلاته
وادعيني
وداع مضنوك النفس
ودموع عينه مونساته
وبعده ذاك كلبي
الطيبة ذاته
انه
ذاك انه اليعيش ابطيف
لو طول بعاده
يل بسمتج فرحتي
ورفة جفن عينج سعادة
يل تبوك عينج من الليل
كل لذة سواده
يل حنيني لشوفتج
حن السكن
غربه البلاده
يل تكولين الونين ايجيد
ون الروح عاده
هذا جانون الكلب
يسري اللهب حتى برماده
وادعيني ابسمتج
اهوه الوداع البي جلاده