اليحجي بسوالف عكل

اليحجي بسوالف عكل يوزن مضيف
اليحجي بالحمره انصحه ايلفله شال
.
الطوله كد النخله بس عقله زغير
هذا يتسجل ضمن حقل الجهال
.
الماكدر للناس يكدر بس لخو
لا ايعاتب ظهره لو بحزامه مال
.
التفكه صح نيشانهه ايحدد مصير
بس وفيه وما تخونك.. لا محال
.
يعني اذا انخاهه لا بـ الله حرام
عدهه فزعه ومن تهد يصفالي بال
.
تعرفه الامعدل صدك من يحجي زين
وتره مايتقشمر بكلمة تعال
.
شويه اثكل جنك ابصينيه ماي
الخفه ماموجوده بطباع الرجال
.
الشجره ميخوفهه بس البيده فاس
الصوج من الشجره ناطيته المجال
.
اتذكر اختك لو تجي ابطاري البنات
وعيب ميحسبوك وي ناس الثكال
.
الوادم المثلك تره مشتهيه موت
تعينو وتثبتو برض القتال
.
فشلة بين الناس تتسمى الرخيص
وفشله ماي الكصه لو من عدهه سال
.
هي نكطة مستحه وتشربهه عين
وين الاكي العنده نكطه وما يزال
.
الكضه عمره اباب مدرسة البنات
وسمع الوادم حجي ما لايقال
.
خل يطم ارويحته لو بيهه زود
الجلب مايرضه يعيش ابهيجي حال
.
هو صوج من الاهل مايستحون
يجوز هي الربته مرخيه الحبال
.
يجوز كاعد والابو يصرف عليه
الا اكلكم هذا من كثر الدلال
يجوز صادق ناس مامحسوبه ناس
انه كلت ايجوز ويجوز احتمال