بوسة عيد

من سمارك
رضعت الحنطة سمار
وغنج شرّبت الطيور ، وفرح شرّبت الزغار
انتَ وحدك ترسم بروحي النهار
انتَ من تنزل ضحكتك يصعد بروحي الخضار
انتَ من تسكت مناجل تحصد بروحي الخضار
ومن اشوفك حضني يدفه
وحده يدفه ، مدري ليش
وروحي كلها تصير شفة !!
تذكر الغيم الصعد مرة بسماي؟
ومطرت عيونك غوه ثلاثين ليلة ..
واعتذرنه من السوالف
والنوافذ والضوه
والخناجر والقبيلة
وفصلت جفني ستاير
وشيعت روحي بخور وقدمتلك گلبي – هيله –

وخضرت كلي عشب ..
من راسي حد راس الجديلة ...
ومن تغيب
الورد يسأل والنجم والحلم ، وذراعي
ونبض گلبي الحنين ..
كلها تسأل – وين –
وين – وين !!
وين غايب .. ؟
واني جامد ... !!
ومن أشوفك
اگبالك اتخيل سرير وحضن دافي والليل بارد
ياملاذ ودنيه غابة
غابة مزروعه خناجر
أنتَ وحدك تسكن بروحي قصيدة
أنتَ وحدك ممكن تسويني " شاعر "
وممكن تسويني – آنه-
وممكن تسويني- غير-
ممكن تسويني دمعة
وممكن تسويني شمعة
وممكن تسويني طير
أعطش
وشفتك كوثر ؟
أبرد
وطولك حرير ؟
وياك أحب حتى النهار يصير ليل
وياك أحب اقره الخرايط من جديد
وياك أحب الريح يعصف
حيل يعصف ..
حتى أسد شباكنه بحجة الريح
حتى أفك شباك ( رفضك ) واستريح
وياك أحب ايامي كلها تصير عيد
حتى افلح شفتك بوسات..
واليمنعني – أگله اليوم عيد –
ـــ ياحياتي ـــ
لان أدري انتَ فراشة
قررت أبقى غصن
وانتَ يالكلك ترافة ...
اني محتاجك حضن
ومااگلك اني – أحبك ..
خاف يتغير طعمها ..
الشفة خاف تبوگ من عدها الترافة
ولذلك راح اضمها ...

ـــ أغنية أخيرة ـــ
جوعان
ماخذني الخجل
ونهدك طفل اگبالنه ايبدي عسل!!!