رسالة إنسانية

نعرف حسين بس چلمة بشهر عاشور
وبعد عاشور حتى ببالنه نغشم
عدنا حسين ثروة وثورة بس يا حيف
نعرف بس ننوح ونبچي ونلطِم
نجيه بلا وعي نطب للشمع دخان
ونبچي ومن بواچينه السمه تغيّم
اشوف اليعدم احلام الفقير ينوح !
وأشوف الباگ عمري حزام متحزم
الامس فردهت أيده أموال للأيتام
اذا ذكروا رقية گباله يتألم !
يلعن حرملة لعبد الله چي چتال
وهو كاسر رگب أطفال تتحلم
بعالي الصوت يضغب وهو امس بالعيد
على نبرة بواچي الفقره ما يهتم
ومن يسمع بطاري العطش ينگط ماي
وما يگطر أمل للحلمه يتثلم
تعال بيا فكر منه افتهمت حسين ؟
شنو معناته اذا يصبح رخيص الدم
المن سال دمه ودمه حبــل الله
اذا الما عنده ذنب أطفاله تتيتم
الحسين إنسان يكره كل حرب لو طيف
قصدي على الستر موقصدي أتوهم
انه ادريبه الحسين شجاع بس شجاع
ما يترك بخاطر وردة من يشتم
الطف طبها الحسين بطبه للإصلاح
مو طبة بطر راد العدل يلتم
مزج من دمه وي خيط الشمس بسمات
تشرگ راد ع الجان بصبح يحلم
يأكل خبزة سمرة ونيته وجه الله
لجل حلم الفقير گباله يتنعم
اذا شافه الفقير شلون يتألم
تدري حسين اعظم بشر بس إنسان
حاله وحال قنبر كلشي بيه يرهم
خل ناخذ درس ونحب صدگ لحسين
خل من واقعه ومن طفى نتعلم
من نهج الحسين تبين العشاگ
من حجي الاقلام الورقة تتقيم