شَذر ليل

ياشيب ايتلاصف من وره الباب
الهندس ماتعنه البيتج وراح
مشه بيج العمر كل شيبه فانوس
ومشيتي وي العمر جن وكفةارماح
النهر جلاب كشخة راس كل كاع
براسج يكشخ الجلاب مرتاح
درابين المحله تضوكج تعيش
لوكت ذيج العصاري هواي ترتاح
عرفت الدنيه بعيونج شذر ليل
حزنج والتعب والدمعه مصباح
الديرم من يطك بالشفه لونين
ثلج سنج لجن كل عمره ما لاح
ضحكتج ما تفرع يم الاجناب
ولا فكت شعرهه سنون مرواح
اشوفج ضحكه النه منين ما اجيج
رغم ذاك الحزن وعيونه الاوكاح
يبت المستحه التستحي من الطين
اثر جدميج عيب بطين لو طاح
تحلفين النفس من يجبل عليج
اخاف بريح وادم غربه ينلاح
ويمعزبة دفو بوكت البرد سيف
المو راسه بحضن حسراته ذباح
نشم شيلة ضواج عيونه اتنام
نشهك كل مسجهه بعصرة الراح
الدللول شملذهه بحلكج تصير
تغريد   البلابل   يمج   صياح
يفياي اليشب طوله بوكت كيض
عباتج حمره يمه وصبرج سلاح