زيج الضوه

دغنيني العشك بالسنطه يتغنه
دحبيني باصابيعي التتن حنه
دبديني اعله كد خصرج سفر متعوب
واشتم الوطن جنه
دخلي اشهك فرك شعرج كمر نعسان
والبد بالضفيره تراب غربه وشوك
دخلي اشتم بشر من طين ما معشوك
دخلي امشي بدرب زيج الضوه المعلوك
اريد التذ بياضج لونه ما مضيوك
وابعثر كل لهفتي بطولج وارتاح
وياخذني السهر وارتاح
ولمج كد حضن مرواح
وطش بيج اعله روحي جن غنه الفلاح
عرفت انه الخدر مفتاح
للشبكه الدفو مفتاح
للنشوه النفس مفتاح
اريد ارتاح ... حيل ارتاح
وازيح تراب كل ذيج البرائه البيج
وارسمنج خجل عالخد
صليلك راح يجويريد
البحضنه الشمس يبرد؟
العيونه اتكحل بالكصيبه باليل
بعد شيسوي بالمرود
دجيسيني بنكيط الغيم
وافرعلج ركص وتراب
وبعد لهناك زفة ماي
تدبين اعله روحي
تجاعيد النهر ثوره
اعله كل دورة وجه للماي
لا ترحين...لاتجفين
روحي بلايه برباعج تحن للطين
بطن جفي يلاكي الريح
ولامزنة نهد جاست بدي نهرين
تدني هناااا لا ترحين
بعد بيه عشك عمرين
بعد بيه خلك جرفين
دحبيني.....
دغنيني....
دغنيني...
(الشاعر سلام الكريزي ميسان العماره)