طلعوا من علي مستنسخين اهواي!

ثاري من علي مستنسخين اهواي!!
حسين الساعدي
؛؛؛؛؛؛
حاير بالعدد واتصفن ابدنياي
هو اجم علي ابهل دنيا ونذكره!!

يمكن مطره صار اتوزع ابهل ماي
شو كلها حضرها ابساعة العسره!

هذا المرتضى لو حيدر الوياي!
لو هذا الامام الكافل الفقره!

ما يتقسم الواحد واشوفه اهواي
موجود الدليل وزايد العشره!!

بالحومه اليندبه ويعتنيه عناي
ويه الصاح حيدر لازم ايحضره

يحجولك قصص وبفزعة الوفاي
وبنفس الوقت مجموعه وبكثره!!!

يقسملك الاول حاضر الحماي
وبهل لحظه هاي وحيدر ابكتره!

والثاني اليكول الحاضر ابلواي
كرار الهواشم يمي وأتذكره!

والثالث يكول المرتضى ابيمناي
جان وباليسار الحيدر النظره!

والرابع يكول ابصولته ابملكاي
عاينت الجثث كدامه مِطَشره!

والخامس يكول ابلحظة الكفاي
بتلاثه الشفتهم ثبت الطبره!!!

والسادس يكول ابندبة الفداي
دافعلي الصميده ابصولته الخطره!

والسابع اليقسم يمي وبممشاي
خلصني ابو احسين ابولية الحصره!

والثامن يقينه وثابت ابهل راي
يمي جان حيدر واشتم ابعطره!

والتاسع وعاشر والاسير الجاي
خلصهم علي وعبرهم العبره!

اشلون ابحرب واحد يصير اهواي!
حيرني اللغز واتحدى اليفسره!

لاهل الميمنه وللميسره العناي!!
ولاهل الوسط خلاها مبتشره!!

كلها ابوقت واحد بلله فكرو اوياي!
اشلون اتقسم ولليندب ايحضره!

طارح هالسؤال ومايصح شراي
تالي اتيقنيت ابحكمة القدره!

طلع مو بس علي والينصرون اهواي
احسبهم الك ونوضح الفكره

طلعوا حيدره وكرارها الشفاي
وابو الحسنين حاضر ويده متحضره

وياهم علي ويتشاورون الراي
وحماي الحمه وراياته منتشره

والصديق الاكبر بالحرب رماي
والفاروق الاعظم والوصي ابكبره

وطلع باب العلم والشاهد القراي
والليث وابن عم منبع العتره

والحصن الحصين البلحشر كفاي
وقسيم الجنه والنار التحت امره

يعني اكو حكمه اتوضحتلي ابهاي
والكعبه الشريفه الجابت الحضره

ثاري من علي مستنسخين اهواي
حته امة محمد تبقه منتصره
حته امة محمد تبقه مننتصره
حسين االساعدي