مدري اشكلت لله!!-حسين الساعدي

توضيت ابدمعتي الماي مكطوع
ما دافع فواتير التجيني!

بعت كلشي مسموح كلشي ممنوع
بيت ابلا غرف ضل يحتويني!

كلت خليني اصلي وانه موجوع
بلكي انه ابصلاتي وتغفه عيني!

واباول ركوع ابركعة الجوع
بطلت الحجي واحجي ابونيني

ماضايك الزاد وصارلي اسبوع
ودحت بالدوخه هاي التعتنيني!

دعيت الله ابصلاتي ودمعي مرفوع
مابيه ارفع ايساري ويميني!

مدري اشكلت لله ابذيج الدموع
مدري النفسي لو موت اليجيني!

والباب الشدهني ابصوت مسموع
ديان ويطالبني اعله ديني!

راد ابدينه هسه ايصير مدفوع
انطيته الصوبه والباب ويقيني!

والثاني الاجاني ابغير موضوع
خطار الاجه ورايد حنيني

صاحالي جوعان ابجوعته ايلوع
طاح اكبالي كالالي اشتريني!

صبرته بلكوه وكلبي مشلوع
نص ساعه الاكل بينك وبيني

طَلعت الكلب من بين الضلوع
وعجنته ابدمي وتخمر عجيني!
عجنته ابدمي وتخمر عجيني!
حسين االساعدي