كلاده حمره

كبرت الفرحه اعله كدنه
كبرت الضحكه اعله كدنه
والهلاهل نثت بكل
الدرابين الكبل جانت مظلمه
وبللينه دروبنه بضويات اهلنه
فاضت الشمعه اعله كل
رازونه صوت
صوت يرفض
باجر انعيش اعله كوه
صوت بيه ريحة الثورة
اليشهك الدخان كوه
اليوم ....
ضحكتنه شكبرهه
اليوم ...
دمعتنه شكبرهه
اليوم .....
زفينه السنابل
مطوكه بلمظة شمسنه
والمناجل غصت
بصوت الهلاهل
وغاد يم الله
اليتم ليلة عرسنه
ركصت الدنيا
اعله غنوتنه الجديده
وخضرينه كلاده حمره
لبني ...لبنك ...
باجر ايحطهه اعله جيده
الكصايب تحنت بلون الشوارع
مخضبه بدخان بيه ريحة وطنه
يااا وطنه
فرزرن الكحله ولمظهه
يااا وطنه
هيه موش نياب حسبالك لمضهه
الكذله راية
ورايتك بيدك تكضهه
والنثايه تلثمت ب ( الله اكبر )
حتى يم العاشك اتتمم فرضهه
الدروب الصفره جانت
فك حزنهه ربيع اهلنه
خضره خطوات المواكد
شبت بتشرين راي بزود اهلنه
هذا يا تشرين ينزع لون اهلنه
الشاعر
سلام الكريزي
٣/نوفمبر/ ٢٠١٩(إنتفاضة تشرين)