أگطع الشك بيقين

حل فرض المشاعر
وإذن بروحي الحنين
وگمت ناوي افطم لسان ذكرچ
أعله بالي بعد
ماريدچ تجين

عشر سنين راكع ابمحراب حبچ
شمدريني بغيري أعتقدتي
وسرچ بگلبچ دفين

مو گلتي المرء أعله دين خله
ليش غيرتي رأيچ
وبدلتي بسرعة دين

أعله قبلة رأيچ رأيي چان
بوصلة وياچ وين
ما تتوجهين

طفت كعبة هواج أحرامي مانعني
أشوفن غير طينچ
مرة طين

بروضة احلامج مثل قربان عايش
قمة أحلامي رضاتچ
وقمة احلامچ كمين

شراع شلتيني المرسى بالچ
كبش قصدچ ينذبح
بس توصلين

طبع دنيا أدوار مسرح
اعترفلچ بارعة بفنچ
كلش خوش تمثلين

وما ألومچ يقظة وتجيدين دورچ
وأنا وأمالي
بحضنچ عمر نمنه مأمنين

مدري حوبة طيبتي لچانت تعثرچ
لو جس نبض تتقصدين

گبلچ الگاطع ندهني وماصحيت
(( هاي هيه
وداعتچ لا تستحين ))

چنت صوت من ابعيد أسمعه
وأظن ضيف أجاچ
وللباب رحتي اتودعين

للهجر حسبيتي وبخفة الذيب أختفيتي
هنيالچ والله حزتي
على الصيد الثمين

لا زرعتي ولامحترگلچ مثلي دم
على الحاضر خذتي كل
محصول السنين

أمسامحچ وما أريد أعذرج
أنا وضميري عرك
ما متراهمين

صفت نيتي وساعة التنفيذ حانت
أنساچ اتناساچ لازم
أگطع الشك بيقين