استشهاد الامام علي عليه السلام
استشهاد أمير المؤمنين (عليه السلام)

كـل ذكـرى كـسـره...وكل نـظـره طـبـره
يا بو صالـح..عايـش حيـاتـك...كل نـظـره طـبـره
ــــــــــــــــــــــــــــــــــــــــــــــــــــــــــــــــ

يبو صالـح ضـوه بروحـي لگـيتك
وابـاوعـلـك دمــع نَـگـع لـحـيـتـك
علـي مو بـيتـه بيتك صار مـولاي
أشـو فــارغ لهـسـه بـاقـي بيـتـك
لبيتك...هذا الفجر هم تحـضر
لبيتك...وبالطبره يرجع حيـدر

وما ترضى زينـب...وحَـدها تنحـب
والغريبه...خَلَص عمرهـا...كل نـظـره طـبـره
ــــــــــــــــــــــــــــــــ1ــــــــــــــــــــــــــــــــ

تجي الزهره العَـزَه وما تبـقى وحـدك
لجرح خدها شتسوي انت اعله خـدك
شلـون اخـدودنـه وما بيـهـن اجـروح
وانـت بگـد دمـعـهـا اجــروح عـنـدك
جرحك...ياهو اليضَمـده الليله
جرحك...ومجروحه كل العيله

الطـبروله گـلبـه...شيضَمـده صعـبـه
وانت گلبك..طبره اعله طوله...وكل نـظـره طـبـره
ــــــــــــــــــــــــــــــــ2ــــــــــــــــــــــــــــــــ

شـفـت زينب شنو امبيـن علـيهـا
طـابـت لو بـعـد چـويـات إديـهـا
إجـت وَحَـدها لـو ويـاهـا عبـاس
وشمـسـوي بأبـو فـاضـل سبيهـا
زينب...شگـدها لعلي دمعتهـا
زينب...بس ما نست غـربتهـا

وأكبر مصيبه...زينب غريبه
والأميره...بهزَل سبوها...وكل نـظـره طـبـره
ـــــــــــــــــــــــــــــــ3ـــــــــــــــــــــــــــــــــ

شفـت طفـلـه إجـت ويه الزجـيـه
ولا تـمـشــي الزجـيـه ابـلا رقـيـه
وين الزهره تمشي اتگـلهـا ويـاچ
أخاف اعليـه يرجع سـوط أمـيـه
إتگـلهـا...لسـه الإِذن تاذينـي
إتگـلهـا...ولَسه الرماد بعيني

وشفت الغـرابـه...بذيچ الخـرابـه
راسه وحـده...وابلايه حضنـه...وكل نـظـره طـبـره
ــــــــــــــــــــــــــــــ4ــــــــــــــــــــــــــــــــــ

أبـو اليـمــه أكـيـد الـلـيـلـه حـاضـر
شنـو بـنـحـره أثـر مـن يـوم عـاشـر
يلطم صدره خاف وتدري الاضـلوع
مــا واحــد سِـلَــم مـــن الحــوافــر
وحِضرَوّ...وين العزيز اگبالك
وحِضرَوّ..الله اليساعد حالك

وما تطفى نارك...الا اويه ثارك
وانت ثارك...ليهسه بعده...وكل نـظـره طـبـره
ـــــــــــــــــــــــــــــــ5ـــــــــــــــــــــــــــــــــ

احمد البصراوي العبادي