محاورة زهيري بين السمرة والبيضة للشاعر عمرالحربي

السمرة:
السمره شمس الضحى والبيضه ليلة شته
وكلب الذي يحبني بس العشك شته
والما يعرف السمر ضيع دليله وشته
حنه وعطر بالجسد والليل شعري صبغ
وما غرهه وجهي بترف وبلا ملامح صبغ
السمره كحل للعين موش بوجنهه صبغ
وكلبي بلهيب العشك جمر المحنه شته

البضية:
البيضة صبحة عيد والوجه نـور بـان
والحسن فوكَ الوجن مثل الثريا بـان
واللي نظر لفتي خسران عقله وبـان
إني البياض الصفي واني الثلج ثوبه
وكل محب شافني كَام وعلن توبه
السمرة لون الفحم والهم صفه ثوبه
والبيضة غصن الندى والوجه نور البان

السمرة:
سمره وبنات العرب تفخر بسمار اللون
والصبر بينا انزرع والوفه بينا لون
والبيضة مثل الشمع تذبل بغير الون
إني التمر والعسل والزاد والقوة
وحيلي قوي بالشدد وعزومي مو رخوة
يا بيضة لونه الثلج مابيج أي قوة
إني الأصل والفصل بية الوفه بكل لون

البيضة:
البيضة غصن البان والورد حاميها
والترف عدها ملك والروح حاميها
والسمرة نار وشبّت وما لكَت حاميها
إني الزلال الصفي الما غثه يوم الكدر
والبياض لو ظهر يطرد سواد الكدر
السمرة همّ وحزن والليل وجه الكدر
والبيضة جنة وفرح والرب هو حاميها

السمرة:
السمار ملح الأرض والخبزة والغيرة
والبيضة لو كبرت تدور لهه غيره
والسمره تبقى عسل ما تطلب الغيرة
إني الذهب والوفه وما يوم طبعي غدر
والسمره نبع الصفا ما بيهه ذرة غدر
البيضة شط النهر لو جف وكت الغدر
والسمره تبقى الأصل والخبزة والغيرة

البيضة:
البيضة لو دللت تخجل شمس ربهه
والكلب الحبني ينسى التعب ربهه
إني الملاك الصفت للناس بربهه
إني الربيع الزهى والورد مثلي عطر
والسمره درب الوعر ما بيها نفحة عطر
يا سمره كافي حجي جفف بياضي عطر
والبيضة تبقى الشرف ضي الكمر ربهه

الشاعر عمرالحربي
البيضة كمر بالسما وبنوره يضوي البال
والسمرة شمس الضحى والبيها كلبي بال
يا صاح حبهم تره فوك الخيال وبال
البيضة ثلج الصفا وبملكاها جنّه وهد
والسمرة جمر العشك الما يوم طفه وهد
احتار كلبي بعشكهم لا نفع لوم وهد
هذا الجمال الصدك .. سبحان رب البال