حيرة معبرجي

من درت وجهي وعيني أمس شافتها
علتي لعجز منها الخلگ شافتها
صفت وي أمها وحركت شافتها
ماوصل طوفتهن سمعنه تعثر
جابت الشيلة أمها و اجت شيلتها
طابگ وصرة وي الطبگ شيلتها
الوجه گمرة وليل جن شيلتها
من گربت لينه المغرب حدر
وصلت المعبر نزلت طابگها
عنبر يفوح من الطبگ طابگها
شافت اهويريتي بجرف طابگها
من حسن حظي وياي رادت تعبر
ركبت وصاحو ربعي ياعبرتنا
النه السره احنه بيا بخت عبرتنا
روح وبعد بالك تصل عبرتنا
بس ترجع براسك مرادي انكسر
لمت عباها وعالطبگ شمرتها
بت المعيدي مبينه من شمرتها
هويريتي عمده من الجرف شمرتها
عالغمگة وتمنيت مرديي اگصر
سيسنه وهويريتي تمشي براحة
كلما تصدلي مني تأخذ راحة
ديرت وجها اعليه ديرت راحة
تطحني واعله البردي اظل أطشر
أدفع واديه من الخجل بردانة
واعرگ ويمسحني الهدم بردانه
تمنيت بالهور انگلب بردي انه
وبحجة الريح بحظنها اتكسر
صاحت عليه شبيك تتورجلي
من راسي تتمعن وصلت لرجلي
من تروح سبعين الف فدوة لرجلي
لواگف بهالحر عالجرف يتنطر
امعرسة طلعت من فلك طراها
لماخذها ماأضن بالسلف طراها
نزلت وبهويريتي ضل طرواها
واعليها حتى المردي ظل يتحسر
راحت واحس روحي انكسر خاطرها
وخطرت ابالي لماجنت خاطرها
لا بيها جيه وأنطر لخاطرها
ولابيه اعارك حتى ارد للمعبر