مو صوجك

مو صوجك ترافة كلبي جانت صوج
انه كلبي واعرفه بالسهل يعثر
مو غلطة نظرتك بيه من تلوح
حجي العين يخدع لو شمس تفتر
من اول ما لجحتك شبهتلي بطيف
من افك جفني اشوفك غيم يتبخر
غيمه انت بظهر والحايطك تموز
لو مو نيل حملك والله ماتدبر
شفتك والعيون اصطكت بملكاك
وسف كزبر جلدها وجلدي ماكزبر
طولك جان صوت وعيني مدها اشعار
على مدة اوتارك شوفي يتكدر
صح انه اعترف بالظاهر شمحلاك
المحلي الحيايه انعومة المظهر
اللوحه الناجحة تحلى بحلاة العين
بس نظرة غشيم تخرب المنظر
وصفتك غشيم وادري زاد اعليك
جيفنك تكش لمن تشم عنبر
صارحتك عشك عبيت خلكي بليل
وانته بكل صلافة تكول ما اكدر
بيك انه ارتبط معقولة ردك جان
غم رايك ولك ماعرف يتخير
تتشرف صفنتك لون ذكري انجاب
ترى كشخة السانك باسمي من ينغر
شطر ماتسوه عندي وللشطر مندوم
الشطر البيه احساسك راسه يتكسر
السعفة شما علت تتجيم بتنور
نار ايواد بيه وانت عود اخضر
اكسر عزتك لو صبها من جلمود
الورد يعرك بصفي يصير لونه احمر
الترافة البيه تكسر حتى عزرائيل
اذا شمني الهوى اعلى الناس يتكبر
خذت طبع الشمس انزف ضوه بهداي
الفكر مني يكرب بيه برزخ حر