ما مغرور

انه رب التواضع والله ما مغرور
ماعندي جنح بس اشبه العصفور
شكد حركوني لكن ابقى اوزع طيب
موش انسان جني ادكول عود ابخور
مو ثوبي التكبر و التواضع فيت
واحترم الصرايف رغم ملكي اقصور
يدك ظلعي البرد واخجل اشيلن فاس
ما متجاوز وكاطعلي بيت اطيور
مدفوع الطبر يكطع غصن مغصوب
عالحطاب اعتب والطبر معذور
اجو ذمه وصرت ركبة وتحولو سيف
وجنت لو مرني طير الخاطره اصبح هور
شمرت اعيوني شبجة وردت اصيد اوجوه
طيبة وماتصوب ظهري من ايدور
بسواد كلوبهم لو اخلي كحلة اضيع
وكلبي ابيض رغم شايل حزن عاشور
يبقى اصفر ترى شكد ماافتر بالماي
غصن يابس يظل ميخضر الناعور
من يدفع الجيلة يصيبهه وميخيب
اكره كلشي اعوج ماعدا الشاجور
انه الينطيني سر ينطيني بت ابيوت
ماكشفه لون بيه الزمان ايدور
انه بروحي حضرة وطيبي طيب ايمام
بس مشكلتي اثق بكل صديق ايزور
ربعي النطو سري وطشرو بحلوك
عليهم مو حقد شايل خلك ناطور
مقصر ويه روحي الخاطر ارضي الناس
جبت عمري انطي لب واني احصل اكشور
غشيم وامنت شمعة بهوى الله تعيش
وامنت بجفن عميان يدخل نور
خاف يموت باجر مايلاكي امجان
الخلص عمره للوادم يبيع اكبور
خل يحفرله حفرة يضمهه وكت العوز
اليدفن يندفن لابد يجيله الدور
عذاب الحنطة متعذب انه اويه الناس
انكص وانطحن واحترك بالتنور